ABŞ kollektiv təhlükəsizliyə töhfəsini azaltmağa qərar verərsə, Avropa Çin və ya Rusiyadan gələn təhdidlərə müstəqil şəkildə müqavimət göstərməyə hazırdır.

Publika.az xəbər verir ki, bunu Avropa Parlamentinin rəhbəri Roberta Metsola deyib.

"Müdafiəmizi və təhlükəsizliyimizi gücləndirmək bizim əsas prioritetimizdir", - o deyib.

Onun sözlərinə görə, son illərdə Aİ ümumi müdafiə xərclərini 30% artırıb və birgə müdafiə tədarükü və silah-sursat istehsalının genişləndirilməsində mühüm irəliləyiş əldə edib. Avropa Müdafiə Fondu üzv dövlətlərə innovativ və qarşılıqlı fəaliyyət göstərə bilən müdafiə texnologiyaları və avadanlıqlarının hazırlanmasında dəstək verir.

“Bundan əlavə, Avropanın müdafiə üzrə komissarı var və Avropa Parlamenti Müdafiə Alt Komitəsinin tərkibini tam hüquqlu komitəyə yüksəldib. Bunlar vacib addımlar idi, lakin biz daha çox iş görməliyik və edəcəyik”, - Metsola əlavə edib.

Avropa Parlamentinin sədri qeyd edib ki, Aİ-nin əsl problemi parçalanmadır: “ABŞ-da 30 silah sistemi işlədiyi halda, Avropada 178 silah var. Parçalanma daha yüksək xərclər və səmərəsizlik deməkdir. Bizə vahid müdafiə sənayesi bazarı lazımdır."