Rusiya və Azərbaycan arasında gərginlik davam edir. İki ölkənin münasibətlərinin normala dönməsində Türkiyənin böyük rol oynayacağı gözlənilir. Burada məsələyə iki fərqli yanaşma var. Birinci mövqe belədir ki, Türkiyə Prezidenti Rəcəb Tayyib Ərdoğan prosesə qarışmayacaq. İkinci yanaşmaya görə isə vasitəçiliyi ən yaxşı məhz Rəcəb Tayyib Ərdoğan edə bilər.

Reallıq, gözlənti necədir? Ərdoğan bu prosesdə vasitəçilik missiyasını üzərinə götürəcəkmi? Belə bir təşəbbüs Azərbaycana lazımdır?

Globalinfo.az-a danışan politoloq Natiq Miri deyib ki, dövlətlərarası münasibətlər beynəlxalq hüquqa, münasibətlər sisteminə dayanır:

“Burada da Azərbaycan beynəlxalq hüquq çərçivəsində tələblər irəli sürür. Rusiya doğru addımı atmalıdır. Azərbaycan təyyarəsi vurulub, həlak olan insanlar var. Ortada cinayət varsa, cəza mütləq olmalıdır. Qazaxıstanın təqdim etdiyi hesabatlar bu faktı ortaya qoyur ki, təyyarəmiz həqiqətən də vurulub. Bütün idarəetmə iflic olandan sonra Rusiyada “kavyor əməliyyatı” elan edilib. Bunlar cinayətdir. Belə hallarda nə etmək lazım gəldiyi beynəlxalq hüquqda qeyd edilib. Azərbaycan mövqeyini açıq şəkildə bildirdi ki, fakt ortadadır, Rusiya da özünə yaraşanı etməlidir”.

Politoloqun sözlərinə görə, Türkiyə Prezidenti Rəcəb Tayyib Ərdoğanın vasitəçilik etməsinin heç bir mənası yoxdur:

“O, nədə vasitəçilik edəcək? Rusiyanı tələblərə uyğun addım atmasını deyəcək? Bu, beynəlxalq hüququn tələbidir və Rusiya ona görə mövqe nümayiş etdirməlidir. Proses tam başa çatmayıb. Hələ ilkin nəticələr açıqlanıb. Artıq hər şey aydınlaşdıqdan sonra Rusiya bununla qane olub-olmadığını bəyan edənə qədər ən azı media səviyyəsində gərginlik davam edəcək. Rusiya nəticələrə rəğmən beynəlxalq hüquqa uyğun yanaşma nümayiş etdirib, cinayətkarları cəzalandırmazsa, Azərbaycan lazımi addımları atacaq”.