“1999-cu ilə qədər bütün danışıqlar prosesi aşağıdakı məzmunda idi: həmsədrlər ərazi bütövlüyü prinsipindən kənara çıxa bilmədilər”.

Globalinfo.az xəbər verir ki, bunu Ermənistanın keçmiş prezidenti Robert Köçəryan fevralın 17-də keçirdiyi mətbuat konfransında deyib.

O bildirib ki, həmsədrlər “öz müqəddəratını təyinetmə” hüququnu “ərazi bütövlüyü” ilə birləşdirməyə çalışırdılar:

“Bu isə “ümumi dövlət” təklifi idi. Yəni öz müqəddəratını təyin edən “Dağlıq Qarabağ” və Azərbaycan müəyyən konfederasiya şəklində birgə dövlət olacaqdı”.

Qeyd edək ki, “ümumi dövlət” modeli Azərbaycanın beynəlxalq səviyyədə tanınmış sərhədləri daxilində qondarma rejimə respublika formasında ərazi vahidi statusunun verilməsini nəzərdə tuturdu. Rəsmi Bakı bu variantı rədd etmiş, Azərbaycanın suverenliyini pozduğunu və ATƏT-in 1996-cı il Lissabon sammitində dövlətlərin ərazi bütövlüyü prinsiplərinə zidd olduğunu bəyan etmişdi.