Ermənistanın “Hraparak” qəzeti Almaniya hökumətinin rəsmi saytına məktub-sual göndərib.

Teleqraf.com xəbər verir ki, məktubda Almaniya Kansleri Olaf Şolza Qarabağla bağlı açıqlamasına niyə düzəliş etməsi ilə bağlı sual ünvanlanıb.

Şolzun ofisindən bir anonim mənbə erməni nəşrinə belə cavab verib:

“Kansler Şolz və Baş nazir Paşinyan arasında danışıqlara maraq olduğuna görə, hökumətin mətbuat katibinin müavini Volfqanq Buxner martın 3-də mətbuat konfransında Almaniya hökumətinin mövqeyini təqdim edib.

Federal kanslerin Ermənistan Baş naziri Paşinyanla yaxşı görüşü olub. Bizdən xahiş edirsiniz ki, Dağlıq Qarabağla bağlı federal hökumətin mövqeyini burada bir daha təqdim edək. Federal hökumətin mövqeyi dəyişməyib.

Almaniya Ermənistan və Azərbaycanın beynəlxalq səviyyədə tanınmış sərhədləri daxilində ərazi bütövlüyünə sadiqdir. Almaniya Ermənistan və Azərbaycanı mübahisəni sülh yolu ilə həll etməyə çağırır. Bura Qarabağ əhalisinin hüquqlarına və təhlükəsizliyinə hörmət etmək daxildir. Federal hökumət üçün vacibdir ki, hər iki ölkənin bütün sakinlərinin hüquqları və azlıqları beynəlxalq standartlara və öhdəliklərə uyğun olaraq qorunsun. Federal hökumət Avropa Şurasının prezidenti Şarl Mişelin səylərini güclü şəkildə dəstəkləyir. Zəhmət olmasa başa düşün ki, biz sonrakı daxili prosedurları şərh etmirik”.

Almaniya kansleri Ermənistan baş naziri ilə Berlindəki görüşündə Qarabağ məsələsindən danışıb. Onun sözlərinə görə, mübahisə Ermənistan və Azərbaycanın ərazi bütövlüyü, eləcə də “Dağlıq Qarabağ əhalisinin öz müqəddəratını təyin etmə hüququ” baxımından həll edilməlidir. Bundan sonra Şolzun çıxışının “Dağlıq Qarabağ xalqının öz müqəddəratını təyin etmə hüququ” hissəsi kanslerin saytından çıxarılıb. Bu, ermənilərin hiddətinə səbəb olub, Ermənistan mediası günlərdir bunu müzakirə edir.