Suriyadakı keçid hökumətinin türk mallarının idxalına gömrük rüsumlarını kəskin şəkildə artırması müzakirələrə səbəb olub. Türkiyənin “Ekonomim” qəzeti tariflərin 300-500% artaraq iki ölkə arasında ticarətin faktiki olaraq iflic edildiyini yazıb.

Rüsumların artırılması sərhəddə minlərlə yük maşınının keçidinə problem yaradıb və gərginliyə səbəb olub. Nəticədə uzun növbə yaranıb. Suriya hökumətinin qərarı Türkiyənin cənub-şərq bölgələrindən ixracata zərbə kimi dəyərləndirilir. Çünki bu ölkəyə ixracat Türkiyə iqtisadiyyatında mühüm rol oynayır.

Türkiyəyə sıx bağlılığı ilə bilinən, hətta bəzi siyasi qüvvələr tərəfindən “Ankaranın adamı” adlandırılan yeni Dəməşq hökumətinin rəhbəri Əhməd əl-Şaranın bu addımı birmənalı qarşılanmayıb. Bəzi ekspertlərin fikrincə, yeni qərar Suriyanın siyasi prioritetlərinin dəyişməsi və ya ölkənin daxili iqtisadi problemləri ilə bağlı ola bilər.

Globalinfo.az-a danışan politoloq Zeynal Əmrəliyev deyib ki, Suriya hökumətinin qəbul etdiyi qərar ikitərəfli münasibətlərə ciddi xələl vurur:

“Əhməd Əl-Şara hökuməti anlamalıdır ki, hazırda regionda özünün ən yaxın müttəfiqi Türkiyədir. Məhz rəsmi Ankaranın dəstəyi ilə Suriyanı yenidən inşa etmək mümkün olacaq. Türkiyə bu müddətdə Dəməşqdə çox böyük yardımlar edib. O baxımdan keçid hökumətinin indiki davranışı anlaşılmazdır. Həmin malları istehsal edən sahibkarların daimi alıcısı olduğu üçün onlar rahat idilər. Bunu bir növ Türkiyə hökuməti də təşviq edirdi. Məqsəd vətəndaş müharibəsinə görə bütün mal-mülkünü itirmiş Suriya xalqına yardım göstərmək idi”.

Politoloqun sözlərinə görə, gömrük rüsumlarının bu qədər qaldırılması Suriya xalqını də çətin vəziyyətə salıb:

“İnsanlar artıq qiymət artımından şikayət edirlər. Bu, yaxşı hal deyil və yeni hökumətə böyük çətinlik yaradacaq. Həm də nəzərə alaq ki, yaxın illər ərzində Suriyanın yeni konstitusiyası qəbul edilməlidir.

Ölkə iqtisadi və hüquqi baxımdan yenidən inşa edilir. Son qərar isə xalqda yeni sistemə qarşı etimadsızlıq mühitini yarada bilər. İqtisadi çətinliklər özü ilə böyük siyasi problemlər gətirir. Əl-Şara hökuməti ölkənin savaşdan yeni çıxdığını və bu baxımdan həssaslığını nəzərə almalıdır. Hazırda onun devrilməsini də istəyən xeyli sayda qüvvə var. Sosial – iqtisadi vəziyyətin pisləşməsi bu qüvvələrin niyyətini reallaşa bilər.

Ümumiyyətlə türk malları ilə bağlı qərarın məntiqi izahı yoxdur. Ümid edirəm ki, Suriya hökuməti etdiyi səhvi düzəldər, çünki bu cür davranış onun özü üçün ziyandır”.