Rusiya Təhlükəsizlik Şurasının katibi Sergey Şoyquya sui-qəsd cəhdinin qarşısının alındığına dair məlumat müzakirələrə səbəb oldu. Ölkənin kəşfiyyat xidməti sui-qəsdin Moskvadakı Troekurovskoye qəbiristanlığında, Şoyqunun qohumlarının məzarlarının yaxınlığında planlaşdırıldığını açıqlayıb.

Belə ki, Şoyqunun ziyarətlərini izləyən cihaz gül vazasında gizlədilibmiş. Kəşfiyyat agentliyi həmçinin Rusiyanın digər bölgələrində də oxşar terror hücumlarının planlaşdırıldığı barədə xəbərdarlıq edib və vəziyyəti hökumət rəsmilərinə qarşı hücum cəhdlərinin bir hissəsi adlandırıb.

Bu, artıq Rusiya üçün yeni mərhələdir? Şoyqu terror aktı nəticəsində öldürülsəydi, Rusiyada nə baş verərdi?

Globalinfo.az-a danışan politoloq Yusif Bağırzadə deyib ki, Sergey Şoyqu Rusiya hakimiyyətində önəmli fiqurdur:

“O, uzun illər Rusiya Federasiyasının Fövqəladə Hallar Nazirliyinin rəhbər şəxsi, indi isə Rusiya Təhlükəsizlik Şurasının katibi kimi fəaliyyət göstərir. Nəzərə almaq lazımdır ki, Şoyqu həm də Rusiyanın siyasi elitasında Prezident Vladimir Putinlə yaxınlığı ilə seçilir. Buna görə də, ona qarşı hər hansı bir terror aktının baş tutması ölkədə rezonans doğura bilər.

Rusiya ilə Ukrayna arasında müharibə davam edir. Tərəflər bir-birinin daxilində terror hücumları törətməkdən çəkinmir. Bu yolla onlar siyasi xadimləri və hərbçiləri hədəfə alırlar. Şoyquya təşkil olunan sui-qəsd baş tutmayıb və rəsmi məlumat yoxdur. Yəni sui-qəsdin dəqiq kim tərəfindən planlaşdırıldığını indiki məqamda demək olmur. Artıq Rusiyanın təhlükəsizlik xidmətləri hücumda günahlandırılan tacik əsilli miqrantları həbs edib”.