Əfqanıstan-Pakistan sərhədində Taliban hərəkatının tərəfdarları ilə pakistanlı hərbçilər arasında toqquşma nəticəsində 24 nəfər həlak olub, 3 nəfər yaralanıb.

Teleqraf.com xəbər verir ki, bu barədə "TOLO News" telekanalı məlumat yayıb.

Məlumata görə, dekabrın 28-də səhər saatlarında Əfqanısatanın Paktika və Pakistanın Xayber Paxtunxva əyalətlərinin qovşağında yerləşən Dand-e-Patan bölgəsində iki ölkənin sərhədçiləri arasında atışma olub. Qarşıdurma zamanı artilleriyadan da istifadə edilib. Nəticədə 19 pakistanlı və 5 əfqan hərbçisinin öldüyü və 3 əsgərin yaralandığı bildirilib.

Pakistan Hərbi Hava Qüvvələrinin Əfqanıstandakı hədəflərə hava hücumları mart ayında bu ölkədəki terror bazalarına analoji hücumlardan sonra ikinci olub. Yeni zərbələr Pakistanın Əfqanıstan üzrə xüsusi elçisi Məhəmməd Sadiqin Kabildə Talibanın xarici işlər naziri Əmir Xan Müttəqi ilə görüşündən bir neçə saat sonra baş verib. Bu, sərhəddə toqquşmaların artması və Əfqanıstanda yerləşən yaraqlılar tərəfindən Pakistanda davam edən terror aktları nəticəsində iki dövlət arasında münasibətlərinin soyuması fonunda yaşanıb.