Yaxın gələcəkdə İranla Əfqanıstan arasında toqquşmanın baş verəcəyi istisna deyil.

Teleqraf.com xəbər verir ki, bunu politoloq Elxan Şahinoğlu deyib.

Ekspert iki ölkə arasındakı son gəlişmələrə və Tehranın planlarına diqqət çəkib:

“İran qonşu Əfqanıstanla sərhəddə divar tikmək istəyir. İran rəsmiləri bunu onunla əsaslandırırlar ki, Əfqanıstandan miqrant axını azalmır və narkotrafik də öz işindədir. Tehrandan onu da bildirirlər ki, İran Əfqanıstanla sərhəddə müxtəlif terrorçu qruplaşmalarla üz-üzədir. Tehran bununla ona işarə edir ki, Taliban Əfqanıstan-İran sərhədinə ya nəzarət edə bilmir, ya da nəzarət etmək istəmir.

Görəsən, Tehran qonşu ölkə ilə 920 kilometrlik sərhəddə divar tikmək üçün lazım olan maliyyəni hardan əldə edəcək? Bu milyardlarla dollar vəsait deməkdir, iqtisadiyyatı ağır günlər yaşayan İranın özünə əlavə valyuta lazımdır.

İranın qonşu ölkələrlə sərhəddə ən gərgin vəziyyət Əfqanıstanladır. İki ölkə arasındakı sərhəddə ara-sıra toqquşmalar baş verir. Taliban silahlıları da İran sərhədçiləri ilə toqquşmalardan çəkinmirlər.

İranın Əfqanıstanla başqa problemi də var. İran sərhəddəki su resurslarına çıxış əldə etmək istəyir. Taliban bunun əleyhinədir, çaylarda bəndlər tikir. Bu mövzuda Tehranla Kabil arasında danışıqlar nəticə verməyib. Bu o deməkdir ki, gələcəkdə də iki ölkə arasında toqquşmaların olacağı istisna deyil”.

Müəllif: Mənsur Rəğbətoğlu