Gürcüstan Kremlə qarşı ritorikasını sərtləşdirib.

Publika.az xəbər verir ki, Gürcüstan prezidenti Salome Zurabişvili “Bloomberg” agentliyinə müsahibəsində Rusiya haqqında kəskin danışıb və ölkənin Avropa İttifaqına daxil olması planlarını açıqlayıb.

O, Avropanı Gürcüstanın istəklərinə diqqət yetirməyə çağırır və Avropa xətti ilə inkişafa maneələri aradan qaldıracağını vəd edir.

“Biz mükəmməl deyilik, bilirəm ki, görmədiyimiz işlər var, amma bütün bunlara baxmayaraq, biz irəli getməliyik”, - Gürcüstan prezidenti “Bloomberg”ə danışıb.

Zurabişvilinin fikrincə, “gürcü məsələləri” də danışıqlar masası üzərində olmalıdır ki, “heç kim Ukrayna böhranının “Rusiyanın bütün işğal olunmuş ərazilərdən, o cümlədən Abxaziya və Cənubi Osetiyadan geri çəkilmədən həll oluna biləcəyini düşünməsin”.

Zurabişvili Rusiyanı Abxaziya və Cənubi Osetiyadan çıxmağa çağırıb. Onun fikrincə, Qərb Rusiya qoşunlarının ölkədən kənarda olduğu hər yerdən çıxarılmasını tələb etməlidir: “Əks halda, Qərb dünyası daha bir böyük səhvə yol verəcək – 2008 və 2014-cü illərdəki kimi”.

O, Ukrayna ilə mümkün gələcək sülh sazişinə Rusiya qoşunlarının Cənubi Osetiya və Abxaziyadan çıxarılmasının daxil edilməsini təklif edib.

Zurabişvili Kremlə Rusiyanın sərhədlərini öyrənməyi tövsiyə edib:

“Rusiya sərhədlərinin harada olduğunu öyrənməlidir".

Gürcüstan dövlətinin başçısı qeyd edib ki, Moskva təkcə Rusiya-Ukrayna deyil, həm də Rusiya-Gürcüstan sərhədini də öyrənməlidir.

Xatırladaq ki, 2008-ci ildə beş günlük müharibədən sonra Gürcüstan Abxaziya və Cənubi Osetiyanın müstəqilliyi ilə barışmalı olub. O vaxtdan bəri ölkədə müzakirələr səngimir. Gürcüstan prezidenti münasibətlərin normallaşmasının və birbaşa uçuşların bərpasının qəti əleyhinədir.

Ultra vətənpərvər dairələrdə bu çıxış gözlənilən həyəcana səbəb olub.

“Gürcüstan da sarsılır. Saakaşvilinin yolu ilə getməyi planlaşdırırlar? 08.08.2008 təkrarlansın?”, - rusiyalı telejurnalist Vladimir Solovyov Gürcüstan prezidentinin sözlərinə belə reaksiya verib.