“Gürcüstan xalqı bu gün tarixi seçkiyə gedir. Əsas mübarizə Qərbə yaxın müxalifətlə, milyarder Bidzina İvanışvili arasındadır”.

Bu sözləri Globalinfo.az-a politoloq Zeynal Əmrəliyev deyib.

O bildirih ki, Gürcüstan parlamenə keçmək üçün seçkilərdə 5 faizlik baryer var:

“2 partiya – iqtidardakı Gürcü Arzusu və həbsdəki keçmiş prezident Mixail Saakaşvilinin qurduğu ana müxalifət Vahid Milli Hərəkat Partiyası parlamentə rahat düşəcəklər. Bundan başqa daha 2 partiyanın – keçmiş baş nazir Georgi Qaxariyanın eyni adlı partiyasının və milyarder Mamuka Xazaradzenin Güclü Gürcüstan Naminə Partiyası da baryeri keçə bilərlər.

Qaxariya 2019 – cu il hadisələri zamanı Daxili İşlər naziri olub. Müxalifətdə sevilən şəxs deyil, Sakaavşili ilə münasibəti pisdir. Rəsmi şəkildə bildirib ki, əgər koalisiya yaradılarsa, qəti şəkildə Vahid Milli Hərəkatla bir masaya oturmayacaq. Ehtimal ki, Qaxariya parlamentə keçəcəyi təqdirdə əvvəli partiyası olan Gürcü Arzusu ilə anlaşacaq.

Xazaredzə isə İvanaşvilinin istər biznes, istərsə də siyasətdə əsas rəqibidir. Onun partiyası qalib gələrsə, Gürcü Arzusu hökuməti qanuni yolla devrilə bilər. İstənilən halda seçki sonrası uzun müddətli mitinqlər və kütləvi iğtişaşlar gözləniləndir. Müxalifətin qalib gəlməsi Qərbin Gürcüstanda möhkəmlənməsinə səbəb olacaq. Bundan sonra bir neçə təsir mexanizmindən istifadə etməsi mümkündür”.

Ekspertin sözlərinə görə, Gürcüstanın Rusiya ilə münasibətlərinin kəskinləşməsi, hətta toqquşma riski var:

“Gürcü Arzusunun qalib gəlməsi isə dindar pravoslav dövlət və olduqca milliyyətçi cəmiyyətin qurulması ilə nəticələnək. Məhz İvanaşvilinin xeyir-duası ilə son zamanlar ölkədə dindar, mühafizəkar və milliyyətçi qruplar dirçəlib. Bundan əvvəlki seçkidə onlar iqtidarın dəstəyi ilə parlamentə gəldilər.

Bu qüvvələr Azərbaycana və Türkiyəyə qarşı heç də xoş münasibət bəsləmirlər və Rusiya ilə münasibətlərin düzəlməsini arzu edirlər. Qeyd edim ki, Gürcü pravoslav kilsəsi hələ də Moskva pravoslav kilsəsinin faktiki nəzarəti altındadır. Onlar düşünürlər ki, Rusiya bütün Gürcüstanı işğal etsə belə, dəyişən bir şey olmaz. Çünki rusların gürcü milli kimliyini qoruyub saxlayacaqları qənaətindədirlər.

Bu qruplar gələcəkdə hakimiyyətə gələ bilər, onlar Bakıya qarşı böyük təhdiddir. Azərbaycan üçün ən sərfəlisi Gürcüstanda nə Qərbə, nə də Rusiyaya meylli olmayan tam bir bitərəf milli hökumətin qurulmasıdır”.

Qeyd edək ki, hazırda Gürcüstanda parlament seçkiləri keçirilir, bütün ölkə ərazisində səsvermə başlayıb.