ABŞ Gürcüstanın keçmiş baş naziri Bidzina İvanişvilinin Rusiya ilə əlaqələrin möhkəmləndirilməsində rolu və ölkənin demokratik yoldan çıxması ilə bağlı narahatlıqların artması fonunda ona qarşı sanksiyalar hazırlayır.

Publika.az xəbər verir ki, bu barədə “Amerikanın Səsi”nə anonimlik şərti ilə ABŞ administrasiyasındakı iki mənbə məlumat verib.

Mənbələr bildirirlər ki, İvanişvilinin iddia edilən hərəkətləri Rusiyanın maraqlarını təşviq edir və Gürcüstanın Avropa İttifaqı və NATO-ya üzv olmaq istəklərini sarsıdır.

“Bizdə məlumat var ki, İvanişvili rus oliqarxları ilə münasibətləri inkişaf etdirmək üçün addımlar atıb və Rusiyanın Gürcüstan bazarına çıxışını asanlaşdırıb. Üstəlik, o, Rusiya kəşfiyyat xidmətlərinin göstərişi ilə hərəkət edib”, - yüksək səviyyəli administrasiya rəsmisi “Amerikanın Səsi”nin gürcü xidmətinə deyib.

1990-cı illərdə Rusiyada sərvət qazanan 68 yaşlı milyarder İvanişvili 2013-cü ildə rəsmi siyasətdən getməsinə baxmayaraq, Gürcüstan siyasətinə böyük təsir göstərməkdə davam edir. O, Tbilisidə malikanədə yaşayır və nadir hallarda ictimaiyyət qarşısına çıxır.

İvanişvilinin təsis etdiyi “Gürcü Arzusu” siyasi partiyası 2012-ci ildən hakimiyyətdədir və bəzi müşahidəçilər onun hələ də əsas siyasi qərarlar verməkdə davam etdiyini düşünürlər.