Gürcüstanda Rusiyaya qarşı ikinci cəbhənin açılması riskləri qalır.

Teleqraf.com xəbər verir ki, bunu Gürcüstanın hakim “Gürcü Arzusu” Partiyasının sədri, keçmiş baş nazir İrakli Qaribaşvili deyib.

“Sülhü, sabitliyi və güclü, sürətli iqtisadi inkişafı qoruyub saxlamışıq. Amma ölkənin ötən il və ondan əvvəlki il üzləşdiyi təhlükəsizlik və ölkəmizin müharibəyə cəlb olunması, ikinci cəbhənin burada açılması ilə bağlı risklər aradan qalxmayıb. Mən bu barədə seçicilərlə, partiyamızın fəalları ilə söhbət etdim və bildirdim ki, “Gürcü Arzusu”nun qələbəsi xalqımız üçün sülh, sabitlik və inkişaf üçün yeganə danılmaz çıxış yoludur”, - partiya sədri qeyd edib.

Qaribaşvilinin sözlərinə görə, Mixail Saakaşvilinin rəhbərlik etdiyi keçmiş hökumət xarici dövlətlərin maraqları naminə gürcü xalqının maraqlarına xəyanət edib və bütün bunlar Gürcüstana çoxlu bəlalar gətirib:

“Ona görə də biz heç kimin ölkəmizi dönə-dönə məhv etməsinə icazə verməyəcəyik”.

Müəllif: Mənsur Rəğbətoğlu