“Azərbaycan Respublikasının Prezidenti İlham Əliyev Rusiya Prezidenti Vladimir Putinin dəvəti ilə oktyabrın 23-də XVI BRIKS Sammitinin “Outreach” / “BRIKS+” formatında iştirak etmək üçün Kazana səfərə gedib”.

Globalinfo.az xəbər verir ki, bunu Milli Məclisin deputatı Vüqar Bayramov deyib.

Onun sözlərinə görə, dünya əhalisinin 45 faizinin məskunlaşdığı BRİKS ölkələri hazırda qlobal iqtisadiyyatın 37.4 faizini formalaşdırır:

“Bu, illik 29.0 trilyon dollar yaxın Ümumi Daxili Məhsul (ÜDM) deməkdir. BRIKS artıq qlobal gücə çevrilib. Belə ki, hazırda BRIKS-ə üzv olan ölkələrin qlobal iqtisadiyyat payı əgər 1992-ci ildə 16.7 faiz, Böyük Yeddilik (G7) dövlətlərinin qlobal ÜDM-də çəkisi 45.5 faiz idi. Lakin ötən müddətdə G7-nin qlobal payı 29.0 faizədək azalıb. 2009-cü ildə yaradılan BRIKS təşkilatı üzv ölkələri üçün inkişaf baxımdan yeni imkanlar yaratdı”.

Deputat bildirib ki, Azərbaycan üçün BRIKS ilə əməkdaşlığın genişlənməsi həm qeyri-neft ixracatının artırılması, həm də fərqli iqtisadi sahələrdə birgə layihələrin reallaşması baxımdan vacibdir:

“BRIKS kifayət qədər geniş coğrafiyanı əhatə edir. Bu isə Azərbaycan sahibkarları üçün ixrac baxımdan yeni imkan kimi dəyərləndirilir. Digər tərəfdən, həmin dövlətlərdə Azərbaycanın qeyri-neft məhsullarına xüsusi tələb də vardır. Eyni zamanda, BRIKS ölkələri ilə turizm sahəsində əməkdaşlıq son illər daha güclənib. Bu ilin ilk 9 ayında ötən ilin eyni dövrü ilə müqayisədə Hindistandan gələnlərin sayı 2,3 dəfə, Çindən – 1,9 dəfə, İrandan – 38,4 faiz, Misirdən – 20,1 faiz, Rusiya Federasiyasından – 18,4 faiz artıb. Bu sahədə daha geniş əməkdaşlıq imkanları və potensial var”.

V.Bayramov qeyd edib ki, BRİKS-lə əməkdaşlığın güclənməsi Azərbaycan üçün həm də öz iqtisadi potensialını təqdim etmək baxımdan da bir imkandır:

“Bu aspektdən, təşkilatla əməkdaşlıq ölkəmizə yeni iqtisadi dividentlər qazandırır. Bu il üçün ümumən sərmayə qoyuluşunun həcminin artırılmasına nail olmaq, o cümlədən investisiya portfelində qeyri-neft sektoruna yönəldilən xarici sərmayələrin payının artırılması əsas hədəflərdən biri kimi qarşıya qoyulub. Bu baxımdan BRİKS ölkələrindən yeni sərmayələrin cəlbi imkanları yüksək qiymətləndirilir. Təşkilatla əməkaşlığın genişlənməsi yeni dövrün hədəflərinin daha tez və səmərəli reallaşmasına töhfədir.”