HƏMAS lideri İsmayıl Haniyənin öldürülməsindən sonra İsrailin “şimal cəbhəsini” açacağı, Qəzzada HƏMAS-ın qalıqları ilə döyüşlərin davam edəcəyi gözlənilirdi. Son olaraq İsrail Silahlı Qüvvələrinin Livanda “Hizbullah”a qarşı həyata keçirdiyi əməliyyatlar diqqət çəkdi.

Bəzi ekspertlərin fikrincə, HƏMAS-dan daha mütəşəkkil qüvvə olan “Hizbullah”ın tamamilə neytrallaşdırılması çətin olacaq. Bundan başqa İranın prosesə müdaxilə edəcəyi də irəli sürülən versiyalardandır.

İran İsrail-“Hizbullah” müharibəsinin tərəfi olacaq?

Globalinfo.az-a danışan politoloq Əlimusa İbrahimov deyib ki, İran həqiqətən olduqca çətin geosiyasi və geostrateji vəziyyətlə üz-üzədir:

“İsrail hər tərəfdən İrana və onun regiondakı mövqelərinə, proksilərinə qarşı hücumlar həyata keçirir. Bununla Tehranı cavab verməyə təhrik edir. Eyni zamanda İran həm Qərb, həm də ABŞ tərəfindən göndərilən mesajlara uyğun olaraq birbaşa hücum etməkdən çəkinir. İsrail sanki İranı özünə hücuma təhrik etmək istiqamətində atdığı addımların boşa çıxmasından qəzəblənərək daha şiddətli yollara əl atır. Təl-Əvivin bu cəhdlərinin faydasız olacağına heç kim zəmanət verə bilməz. İran həqiqətən İsrailin demarşlarından bezib, ABŞ-ın təhdid və xəbərdarlıqlarını kənara qoyub cavab zərbəsi endirməyə getdikcə yaxınlaşır.

Proqnoz vermək çətindir, amma görünən odur ki, İsrail İranın indiki şəraitdə hücum etməsində olduqca maraqlıdır. Məlum olduğu kimi ABŞ-da Donald Trampın hakimiyyətə gəlmək ehtimalı İsrailin Baş naziri Benyamin Netanyahu və müharibə kabinetini bir qədər sakitləşdirmişdi. Düşünürdülər ki, keçmiş prezident yenidən seçiləcək və ilk fəaliyyəti dövründə İsraillə bağlı bitirmək imkanı olmadığı məsələləri başa çatdıracaq. Yəni İranın nüvə proqramını məhv etmək adı altında onun hərbi sənayesi və iqtisadiyyatını çökürdəcək addımlar atacaq”.


Əlimusa İbrahimov

Politoloqun sözlərinə görə, Kamala Harrisin prezidentliyə namizəd kimi ortaya çıxması Trampın yenidən seçilmək ehtimalını sıfıra yaxınlaşdırdı:

“Trampın seçilməyəcəyi artıq reallığa çevrilir. İsraildə artıq onun prezident olmayacağına əminlik yaranır. Məhz ABŞ Senatında çıxış etdikdən və Trampla görüşdən sonra Netanyahu İranla müharibəyə daha ciddi girişməyə başladı. Yəni Amerikadakı seçkilərə qədər İranla müharibə indi Netanyahunun ən böyük arzusudur. Çünki müharibə olarsa, bu, eyni zamanda demokratların əleyhinə işləyə və Trampın hakimiyyətə gəlməsinə yol aça bilər. Məhz ona görə də Netanyahu İranla elə indi, bu gün müharibənin başlanmasını istəyir. Çünki məhz İranın İsrailə birbaşa hücumu Vaşinqton və koalisiyanın Tehrana qarşı müharibəyə başlaması ilə nəticələnə bilər. Netanyahunun da məqsədi elə budur. Amerika onun İranla müharibəsinə yaşıl işıq yandırsın və İsrail tərəfindən İrana qarşı mübarizəyə qoşulsun.

Amma ABŞ-ın indiki halda Yaxın Şərqdə genişhəcmli toqquşma və onun nəticəsində baş verə biləcək III Dünya müharibəsindən qaçmaq istəyini şərtləndirən digər səbəb var. İranla müharibə 3-5 il bundan qabaq baş versəydi, ABŞ böyük məmnuniyyətlə ona qarşı hücumlarda İsrailin yanında olardı. Amma Rusiya-Ukrayna müharibəsinin şiddətli vaxtında diqqəti oradan ayırıb Yaxın Şərqə yönəltmək heç də Pentaqonun arzuladığı məsələ deyil. Bu, Rusiyanın Ukraynanı darmadağın etməsi ilə nəticələnə bilər. Çünki iki cəbhədə müharibə aparmaq Ağ Ev və onun müttəfiqlərinin öhdəsindən gələ biləcəyi məsələ deyil”.

“İran nə qədər çətin olsa da, ABŞ-dakı seçkilərin nəticəsini gözləmək məcburiyyətindədir. Çünki demokratlarla gizli danışıqları olub. Onlar indiki halda Netanyahu ilə bacarmadıqlarını İrana başa salıb və təxribatlara getməməyi ondan xahiş ediblər”, – politoloq bildirib.