ABŞ Rusiya və Çindən yan keçməklə, Mərkəzi Asiya ölkələrindən dünya bazarlarına Azərbaycan və Ermənistan ərazilərindən keçəcək yeni quru yolu yaratmaq imkanını nəzərdən keçirir.

Publika.az xəbər verir ki, bunu ABŞ dövlət katibinin Avropa və Avrasiya məsələləri üzrə köməkçisi Ceyms Obrayen çərşənbə axşamı bildirib.

"Mərkəzi Asiya ölkələri inanılmaz dərəcədə zəngindirlər və hazırda onların dünya bazarlarına çıxışı üçün yeganə variant Rusiya və ya Çindən keçir. Əgər biz Ermənistan və ya Azərbaycandan keçən marşrut aça bilsək, o zaman onlar dünya bazarlarına çıxış əldə edəcəklər. Rusiya və Çindən daha az asılı olacaqlar”, - Obrayen Senatın Xarici Əlaqələr Komitəsində deyib.

İyulun əvvəlində ABŞ Beynəlxalq İnkişaf Agentliyinin (USAİD) administratorunun köməkçisinin müavini Anjali Kaur bildirmişdi ki, ABŞ 2025-ci ildə genişləndirilmiş maliyyələşdirmə sayəsində Mərkəzi Asiya ölkələri üçün Rusiya və Çinə “etibarlı alternativ” ola bilər.