Rusiya ordusu bütün cəbhə boyunca hücum əməliyyatlarını gücləndirib. ABŞ-nin hərbi yardımının gecikdirilməsi səbəbindən Ukrayna resurslar toplamalı və müdafiə prioritetləri ilə bağlı çətin qərarlar qəbul etməli olacaq.

Teleqraf.com xəbər verir ki, bu barədə ABŞ-nin Müharibə Araşdırmaları İnstitutunun (ISW) təhlilində deyilir.

Rusiya qoşunları bütün əməliyyat teatrında hücumların sürətini artırıb. Son hücum əməliyyatının nəticələri göstərir ki, Rusiya hərbçiləri canlı qüvvə və texnika itkilərini uğurla kompensasiya ediblər.

Ukrayna Prezidenti Vladimir Zelenski və yüksək rütbəli hərbçilər yardımın gecikdirilməsinin döyüş meydanında təşəbbüsü Rusiyaya verməyə məcbur etdiyini vurğulayıb. Amerikalı analitiklər hesab edirlər ki, Ukrayna nə vaxt və hansı yardım alacağını bilmədən uğurlu əks-hücum və ya müdafiə planlaşdıra bilməz.

"Ukrayna ordusu Rusiyanın hərbi potensialının məhdudlaşdırılması təşəbbüsü ilə mübarizə və ya gələcək əks-hücum əməliyyatlarının planlaşdırılması hesabına müdafiənin müəyyən aspektlərinin prioritetləşdirilməsi ilə bağlı çətin qərarlar qəbul etməli olacaq. Səbəb ABŞ-də hərbi yardım paketi ətrafında uzun sürən müzakirələrdir", - ISW qeyd edib.

Müəllif: Mənsur Rəğbətoğlu