Avropa Komissiyası və Avropa İnvestisiya Bankı Rusiyadan yan keçən nəqliyyat dəhlizinin yaradılması məqsədilə Mərkəzi Asiyanın strateji nəqliyyat infrastrukturu obyektlərinə 1.5 milyard avro investisiya qoymaq niyyətindədir.

Teleqraf.com xəbər verir ki, bu barədə Avropa Komissiyasının vitse-prezidenti Valdis Dombrovskis məlumat verib.

“11 min kilometr uzunluğunda nəqliyyat dəhlizi bölgələrimizi birləşdirəcək. Bu dəhlizi rəqabətədavamlı etməliyik, konkret nəticələr əldə etmək niyyətindəyik. Buna görə də Avropa Komissiyası və Avropa İnvestisiya Bankı Mərkəzi Asiyanın nəqliyyat imkanlarına 1.5 milyard avro sərmayə qoymaq niyyətindədir. Daha sonra müvafiq anlaşma memorandumları imzalanacaq”, - Avropa Birliyi rəsmisi deyib.

Dombrovskis marşrutu dəqiqləşdirməyib. Çox güman ki, söhbət Azərbaycandan da keçən Orta dəhlizdən gedir. Eləcə də bu xəttin bir hissəsi olan Zəngəzur dəhlizindən...

Müəllif: Mənsur Rəğbətoğlu