Avropa İttifaqı ( Aİ ) Ukraynaya 20 milyard avro məbləğində maliyyə yardımı planı - "B" planını nəzərdən keçirir.

Publika.az xəbər verir ki, bu barədə "Financial Times" qəzeti mənbələrə istinadla yazır.

Bildirilir ki, Macarıstanın Baş naziri Viktor Orban növbəti dörd il ərzində Kiyevə 50 milyard avro ayırmağı əngəllədikdən sonra Ukraynaya maliyyə dəstəyinin yeni variantlarının nəzərdən keçirilməsi zəruri olub.

Yeni planda Aİ üzvlərinin icma büdcəsi qarşısında öhdəlik götürmələri nəzərdə tutulur ki, bunun sayəsində Avropa Komissiyası (AK) Kiyev üçün 20 milyard avro borc ala biləcək. Materialda deyilir ki, 2020-ci ildə Avropa İttifaqı pandemiya zamanı onlara dəstək olmaq üçün Avropa ölkələrinə 100 milyard avro məbləğində kredit verəndə Aİ oxşar sxemdən istifadə edib.

Qeyd edilib ki, maliyyənin yekun məbləği Ukraynanın ehtiyaclarından asılı olacaq.

Qəzet iddia edir ki, sxemin əsas üstünlüyü ondan ibarətdir ki, o, bütün Aİ üzvlərinin razılığını tələb etmir və bu, Macarıstandan yeni veto riskini aradan qaldırır.

Hüseyn İbadlı