İsrail və HƏMAS-ın ikinci mübadilə və atəşkəs haqqında danışıqlar apardığına dair xəbərlər artır. ABŞ Müdafiə naziri və Baş Qərargah rəisi İsrailə gedərkən, “Mossad” rəhbəri və vasitəçi Qətərin baş nazirinin Polşanın paytaxtı Varşavada görüşdüyü bildirilir.

Publika.az xəbər verir ki, ikinci humanitar vasitəçilik və mübadilə razılaşması üçün Qətər vasitəsilə HƏMAS-la danışıqlara başlanılıb. İsrail mətbuatında yer alan xəbərə görə, İsrail rəhbərliyi HƏMAS-a genişmiqyaslı girov mübadiləsi təklifi etməyi planlaşdırır. Təl-Əviv rəhbərliyi İsrail həbsxanalarından daha çox fələstinli məhbusun azad edilməsi müqabilində HƏMAS-ın nəzarətində olan qadınların, xəstələrin, yaralıların və qocaların təhvil verilməsini tələb edən “böyük mübadilə razılaşması” təklifi hazırlayır. Müqaviləyə həmçinin müvəqqəti atəşkəs və Qəzza zolağına yardımın daxil olması da daxildir.

ABŞ Müdafiə Naziri Lloyd Ostin =Tel-Əvivdə yüksək səviyyəli İsrail rəhbərləri ilə görüşüb. Bu zaman İsrail kəşfiyyat təşkilatı "Mossad"ın rəhbəri David Barneanın Polşanın paytaxtı Varşavada Qətərin Baş naziri və Xarici İşlər Naziri Məhəmməd bin Əbdürrəhman Əl Tani ilə görüşdüyü iddia edilib.

Digər tərəfdən, Ağ Evin sözçüsü Con Kirbi Qəzzada döyüşlərin dayandırılması və girovların azad edilməsi ilə bağlı razılaşmanın "yaxın olmadığını" söyləyib.

Aysel Şahmar