Bildirilib ki, ABŞ administrasiyası Qəzzaya hücumları ilə bağlı İsrailə “xüsusi” xəbərdarlıq edib, ona görə də İsrailin hücumları yanvar ayına qədər bitə bilər.
Elchi.az xəbər verir ki, bəzi yüksək rütbəli ABŞ rəsmiləri CNN-ə verdiyi açıqlamada, ABŞ prezidenti Co Bayden administrasiyasının dünya ictimaiyyətinin etirazı nəticəsində ” Qəzzaya hücumların indiki formada davam etdirilə bilməyəcəyini” İsrail rəhbərliyinə çatdırdığını bildirib.
Adlarını açıqlamayan rəsmilər bildiriblər ki, Birləşmiş Ştatlar İsrailin beynəlxalq dəstəyi saxlamaq üçün vaxtının “sürətlə azaldığına” inanır.
Səlahiyyətlilər buna görə də İsrailin Qəzzanın cənubunda intensivləşdirdiyi qurudan hücumlarının HƏMAS üzvlərinə və liderlərinə qarşı “daha dar miqyasda və daha az intensivlikdə” davam edə biləcəyinə diqqət çəkib.
Yüksək səviyyəli mənbələr qeyd ediblər ki, Vaşinqtonla Təl-Əviv administrasiyası arasında “sərt” danışıqlarda İsrailə “Qəzzada mülki itkiləri azaltmalı” mövzusunda “ciddi” xəbərdarlıq edilib.
Həftə sonu Reyqan Milli Müdafiə Forumunda etdiyi çıxışında ABŞ-ın müdafiə naziri Lloyd Ostin “İsrail liderlərini mülki əhali arasında itkilərdən və məsuliyyətsiz ritorikadan şəxsən çəkinməyə, İordan çayının qərb sahilində məskunlaşanların zorakılığının qarşısını almağa və humanitar yardıma çıxış imkanlarını əhəmiyyətli dərəcədə genişləndirməyə çağırıb. ”