Əvvəlcədən gözlənildiyi kimi, Azərbaycan əleyhinə başlanmış media kampaniyası davam etdirilir. ABŞ-ın 1927-ci ildə təsis edilmiş radikal klerikal “The National Catholic Register” nəşri “Hamı tərəfindən unudulub”: Dağlıq Qarabağda Azərbaycanın blokadasının erməni qurbanlarının sınağı” başlıqlı yazı dərc edib.

Yazı erməni lobbisinin yenidən 1980-ci illərdə olduğu kimi müsəlman və türklərin əhatəsində əzilən əzabkeş xristian azlıq haqda uydurduqları stereotipləri qabardır. Xristian –müsəlman qarşıdurması, “pis türklərin incitdiyi əzabkeş xristianlar”, “bölgənin xristian qalası”, “xristianlığı qəbul etmiş ilk xalq” kimi stereotiplər üzrə təbliğat ilk dəfə 1980-ci illərin sonlarında, son vaxtlar isə II Qarabağ savaşı ərəfəsində xeyli artmışdı. Belə stereotiplər fonunda neçə aydır blokadada olan erməni anklavında yaxınlaşan “humanitar fəlakət, əsasən xristianların yaşadığı bölgədə etnik və dini təmizləmə” haqda qavrayışları canlandırır. Yazıda iddia olunur ki, dünyanın ən qədim xristian dövləti olan Ermənistan xalqı yaşamaq üçün yenidən mübarizə aparır.

Qonşusu və tarixi düşməni Azərbaycanla son müharibənin başa çatmasından və bunun ardınca uzun müddətdir “mübahisəli olan” Dağlıq Qarabağ ərazisini verməyə məcbur edilməsindən təxminən üç il sonra həmin bölgədə qalan 120 minə yaxın insanın vəziyyəti hazırda kritikdir. Çünki 2022-ci ilin dekabr ayından etibarən etnik anklavı Ermənistanla birləşdirən yeganə yol olan “Laçın dəhlizi” Azərbaycan hökumətinin təhrik etdiyi bir sıra blokadaların obyekti olub və onu ciddi humanitar böhrana sürükləyib.

Fransanın SOS Chrétiens d'Orient (SOS Şərq xristianları) təşkilatının Qarabağ üzrə nəzarətçisi Aram Kayayan, "Azərbaycan hakimiyyəti vintləri sıxmaq, məcburi tədbirləri sərtləşdirmək və yerli əhalini tərk etməyə məcbur etmək üçün erməni təxribatlarını imitasiya etməyi vərdişə çevrib" deyib.

Amerika Erməni Milli Komitəsinin (ANCA) Artsax bölməsinin rəhbəri Gev İskajyan “Register”ə bildirib ki, ərazidə elektrik enerjisi, qaz və internetə fiber-optik çıxışın kəsilməsi ilə müşayiət olunan çoxsaylı ərzaq, dərman və yanacaq çatışmazlığı var.

Kaliforniyada erməni ailəsində anadan olan İskajyan 2020-ci il müharibəsindən sonra “yerli əhaliyə daha yaxşı dəstək olmaq və ABŞ-da bu xristian vətəninin Qafqazdakı taleyi barədə məlumatlılığı artırmaq” məqsədilə ANCA filialını açmaq üçün Dağlıq Qarabağa köçüb. Onun sözlərinə görə, Amerika hakimiyyəti dəhlizin yenidən açılmasını tələb etsə də, indiyədək təqib olunan ermənilərin xeyrinə heç bir konkret addım atılmayıb.

Klerikal nəşr əlavə edir ki, Rusiya-Ukrayna müharibəsi fonunda Avropa Azərbaycanı qaz tədarükü üçün imtiyazlı tərəfdaş kimi tanıdı, Azərbaycan isə öz növbəsində Ermənistanı məcbur etmək istəyir ki, onu Naxçıvan anklavı ilə birləşdirən Mehri dəhlizindən imtina etsin. "Təəssüf ki, mən qorxuram ki, həm Avropa, həm də ruslar qazın tədarükü və Türkiyə üzərindən Avropaya malların nəqli üçün Ermənistan ərazisindən keçən bu ekstraterritorial dəhlizin açılmasında maraqlıdırlar", - deyə hazırda Qarabağa yaxın olmaq üçün Sünikdə (Zəngəzurda) məskunlaşan A.Kayayan bildirib: “Bu həm də Rusiyanın Azərbaycan üzərindən Türkiyəyə çatması və bununla da Qafqazdakı əsas rəqibi Gürcüstandan yan keçməsinin bir yoludur”.

Nəşr stereotip yanaşmasını davam etdirərək yazır ki, ermənilərin o dövrdə kütləvi şəkildə məhv edilməsi pantürkistlərin türkdilli müsəlman ölkələri olan Azərbaycan, Türkmənistan, Özbəkistan, Qırğızıstan və Qazaxıstanı türk bayrağı altında birləşdirmək arzusunu həyata keçirmək məqsədi daşıyırdı. “Bu, onların əsas ideologiyasıdır; onların ambisiyaları ötən əsrdə olduğu kimi qalır və bu günə qədər Ermənistan Türkiyə ilə Azərbaycan arasında dayanan və ərazi birliyi arzusunu kəsən yeganə ölkədir”.

Cəmaləddin Quliyev, siyasi ekspert