Ötən gün 81 əyalətin başçısı ilə 8,5 saatlıq görüş keçirən CHP sədri Kamal Kılıçdaroğlu istədiyinə nail olub. İclasda üzərlərinə qoyulan “Kılıçdaroğluna dəstək bəyannaməsi”ni imzalamayan bir çox əyalət başçıları 1 gün sonra geri addım atmalı olub.
Publika.az Türkiyə mətbuatına istinadən xəbər verir ki, çərşənbə günü keçirilən görüşdə gərgin anlar yaşanıb və dəyişikliyə tərəfdar olan bir çox vilayət başçısı sonradan geri addım atıb.
Hətta iclasın sonunda bəzi vilayət başçılarının Kılıçdaroğluna dəstək verən bəyanatı imzalamaq istəmədiyi və bu mövzuda narazılıq yarandığı bildirilib.
Məlumata görə, bəyanatda həmçinin, İstanbul Bələdiyyə Başçısı Əkrəm İmamoğluna qarşı yazılan cümlələr də diqqətlərdən yayınmayıb:
“Dəyişiklik sehrli sözdür, lakin daimi dəyişikliyi insanlardan çox ideyalar və prinsiplər gətirir. Aydındır ki, insana əsaslanan xilaskar ritorikasından irəli gələn struktur və funksional çatışmazlıqları ehtiva etməyən dəyişikliyin tələbləri sağlam nəticələr verməyəcək”.
Açıqlamada Kılıçdaroğlunu tərif edən cümlələr də qeyd edilib: “Bildirmək istərdik ki, seçki prosesi zamanı hər birimizdən daha çox çalışdığının şəxsən şahidi olduğumuz sədrimizi gözdən salmağa yönəlmiş yanaşmaları bəyənmirik”.
Digər bir məsələ isə 28 maydan bəri İstanbul Bələdiyyə Başçısı Əkrəm İmamoğlunun sədr olmasının tərəfdarı olan və CHP sədri Kamal Kılıçdaroğlunu sərt şəkildə tənqid edən Bolu Bələdiyyə Başçısı Tanju Özcanla bağlıdır. Belə ki, onunla bağlı məsələ qovulma tələbi ilə partiyanın intizam komitəsinə göndərilib.
Qərardan sonra Özcanın sosial media hesabından ilk açıqlaması isə “Üsyan edirəm” olub.
Bundan əvvəl də 1 il müddətinə müvəqqəti olaraq partiyadan uzaqlaşdırılan Tanju Özcan cəzasını müddəti bitdikdən sonra iyunun 13-də CHP-yə qayıdıb.
O da qeyd olunur ki, mayın 28-dən bəri istefa təzyiqinə tab gətirməyi bacaran CHP sədri Kamal Kılıçdaroğlu ən böyük rəqibi kimi göstərilən İstanbul Böyükşəhər Bələdiyyə Başçısı Əkrəm İmamoğluna qarşı planı hazır saxlayır.
İddiaya görə, Kılıçdaroğlu, İmamoğlu geri addım atmasa və sədrlik həvəsini davam etdirərsə, CHP-nin İstanbul Böyükşəhər Bələdiyyəsinə millət vəkili Mustafa Sarıgülün namizədliyini irəli sürəcək.
Gülnar