Əgər Ukraynanın əks-hücum əməliyyatı kifayət qədər uğurlu olarsa, Rusiyada yeni səfərbərlik dalğası elan edilə bilər. Budəfəki çağırışçıların sayı ötən payızdan daha çox olacaq.

Axar.az xəbər verir ki, bu barədə “Nyu York Tayms” nəşri Qərb mənbələrinə istinadla yazıb.

“Qərb rəsmiləri etiraf edirlər ki, indiki əks-hücumla rusları bütün Ukrayna ərazisindən qovmaq inandırıcı deyil. Bununla belə, əks-hücum iki uğur ortaya çıxara bilər: Ukrayna ordusu əvvəllər ruslar tərəfindən işğal edilmiş əsas ərazilərini geri alır və vurulan zərbə nəticəsində Kreml Ukraynaya qarşı növbəti müharibə perspektivinə şübhə ilə yanaşır”, - nəşr bildirib.

Qəzet onu da qeyd edib ki, Zaporojye AES-in azad edilməsi Ukrayna üçün həm simvolik, həm də strateji qələbə olacaq:

“Ukrayna üçün rusların hərbi logistikasını asanlaşdıran Krıma quru yolunu kəsmək vacibdir. Bu, yarımadadakı Rusiya hərbi obyektlərini təhdid etməyə və oradakı qoşunların təchizatını pozmağa imkan verəcək”.