Azərbaycan və Ermənistan xarici işlər nazirlərinin iyunun 12-də Vaşinqtonda gözlənilən görüşü təxirə düşüb: rəsmi İrəvan iddia edir ki, görüşün təxirə salınmasını rəsmi Bakı istəyib; Dövlət Departamenti və rəsmi Bakı görüşün təxirə salındığını elan etsə də, İrəvanın iddiası ilə bağlı heç bir qeyd yoxdur;

Görüşün hansı səbəbdən təxirə salındığı konkret açıqlanmır, hərçənd, bir neçə məqam müəyyən ehtimalları irəli sürməyə imkan verir.

- Mayın əvvəlində keçirilən Vaşinqton görüşündə tərəflərin “Qarabağdakı erməni əhalisini hüquq və təhlükəsizliyinin təmin edilməsi” məsələsində fikir ayrılığı qeydə alındı: İrəvan “beynəlxalq mexanizm” və “Xankəndi-Bakı formatı” kimi qondarma təkliflərlə “hüquqi münaqişə”nin əsasını qoymaq istəyir, Bakı bundan qəti şəkildə imtina edir;
- Brüssel və Moskva görüşündən sonra, Kişinyov görüşündən əvvəl Əliyev separatçılar üçün “amnistiya” təklifini irəli sürdü və bu, Vaşinqton tərəfindən dəstəkləndi;

Bunu diplomatik masada Bakının Qarabağ məsələsi üzrə irəliləyişi kimi qəbul edə bilərik, lakin praktiki olaraq nəticələri yoxdur. Və bunun fonunda növbəti Vaşinqton görüşünün gündəliyinin də eyni olacağı bəllidir: İrəvan Qarabağ iddiasını “beynəlxalq mexanizm” üzərindən davam etdirəcək, Bakı imtina edəcək;

Mümkündür ki, Bakı “beynəlxalq mexanizm”, “Xankəndi-Bakı formatı” kimi məsələləri gündəlikdən çıxaracaq addımlar atmaq, daha sonra Vaşinqtonda müzakirələrə qatılmaq və ABŞ-ın dəstəkədiyi “amnistiya”nın yeganə seçim olduğunu daha güclü şəkildə irəli sürməklə bağlı gediş edə bilər.

Bu kontekstdə Qarabağdakı separatçıların hərbi müstəvidə təxribat addımlarının intensivləşdiyinə dair informasiyaların artması, mümkün praktiki addımlara zəminin yaranması diqqət çəkir.

Asif Nərimanlı