“Ermənistan Azərbaycanla danışıqlar məsələsində təzyiq altındadır, çünki İrəvan açıq şəkildə prosesi uzatmaq kursu götürüb”.

Publika.az xəbər verir ki, bu sözləri “Sputnik Ermənistan”a müsahibəsində politoloq Suren Surenyants deyib. Eyni zamanda o əmindir ki, Ermənistana həm Moskva, həm də Vaşinqton təzyiq göstərir.

"Erməni tərəfinin danışıqları ləngitməsinin səbəblərini açıqlamırıq - niyə belə olduğu aydındır. Çünki istənilən halda hansı ölkənin moderator olmasından asılı olmayaraq, qərar Ermənistanın xeyrinə olmayacaq", - politoloq deyib.

Ekspert qeyd edib ki, Ermənistan-Azərbaycan danışıqları ilə bağlı ictimai məkanda iki ziddiyyətli məlumat səslənir. İlk olaraq Rusiya Xarici İşlər Nazirliyinin rəsmi nümayəndəsi Mariya Zaxarova Lavrov-Bayramov-Mirzoyan arasında Moskvada keçiriləcək görüşlə bağlı razılıq əldə olunduğunu və tarixin daha sonra açıqlanacağını bildirdi. Öz növbəsində Ermənistan Xarici İşlər Nazirliyi bu məlumatı təkzib etməyib. Bununla yanaşı Vaşinqtonda görüşün “ssenarisi” də dövriyyəyə buraxılıb.

"Brüssel arenasının təsir qabiliyyətinin itirilməsi fonunda Vaşinqtonla Moskva arasında açıq-aydın rəqabət var. Bu qarşıdurmanın nə ilə bitəcəyini təxmin etmək hələ çətindir, lakin mən Moskvadakı görüşün baş tutacağını ehtimal edirəm. Birincisi, Rusiya tərəfi artıq bu görüşü rəsmən elan edib. Aydındır ki, bu görüş kimin təqsiri üzündən pozulacaqsa, onu ciddi problemlər gözləyir”, - ekspert vurğulayıb.

Ermənistan Təhlükəsizlik Şurası katibinin İrəvanın Fransa ilə Laçın dəhlizinə missiya göndərilməsi məsələsini müzakirə etməsi ilə bağlı bəyanatına münasibət bildirən Surenyants deyib: "Armen Qriqoryan hələ də uşaq nağıllarına inanır. Əgər Azərbaycan Rusiya sülhməramlılarının bölgədəki təsirini zəiflətmək üçün səy göstərirsə, sizcə, o, Laçın ərazisində beynəlxalq mövcudluğa razı olacaqmı?

Təbii ki, yox! Bu məsələ ATƏT və ya BMT-də müzakirə oluna bilər. ATƏT-də birmənalı olaraq Azərbaycan veto hüququndan, BMT Təhlükəsizlik Şurasında isə Rusiya bu hüquqdan istifadə edəcək. Görünür, Qriqoryan tam anlamadığı bir şeydən danışır və onun sözləri çox da ciddi qəbul edilməməlidir”.