“Yeltsin-2”-nin Rusiyada hakimiyyətə gəlməsi ehtimalını hərbi-siyasi ekspert, İsrail gizli xidmətinin keçmiş rəhbəri Nativ Yakov Kedmi qiymətləndirib.

Publika.az-ın məlumatına görə, o bildirib ki, Putinin qeyd etdiyi əsas strateji vəzifə Rusiyada bacarıqlı siyasi elitanın yaradılmasıdır.

Ekspert hesab edir ki, bundan sonra Rusiya dövlətinin qarşısında duran çağırışlara adekvat cavab verəcək rəhbərlik formalaşdırıla bilər.

“Əgər o bunu bacararsa, Rusiyanın böyük gələcəyi olacaq. Əgər o, həyat qabiliyyətli siyasi elita yarada bilməsə, o zaman Rusiyadan yalnız tarixi baxımdan danışılacaq”, - Yakov Kedmi hesab edir.

Onun fikrincə, hər hansı dövlətin başçısı heç vaxt qeyri-məhdud səlahiyyətə malik deyil, həmişə müəyyən məhdudiyyətlər olur: “Vladimir Putinin qarşısında duran əsas problem hakimiyyətin və dövlətin sabitliyinin qorunmasıdır. İstənilən növ radikal islahatlar ölkəni tarazlıqdan çıxarır, Rusiya artıq bir neçə dəfə bu yoldan keçib, uçurumun astanasında dayanıb”.

Yakov Kedminin sözlərinə görə, Putin bəzən problemləri daha yumşaq və tədricən həll etməyə çalışır, çünki radikal tədbirlər görməklə ölkədə sabitliyin pozulmasına gətirib çıxarar. Ekspert hesab edir ki, Putin ölkəni obyektiv və subyektiv amillər əsasında idarə edir ki, onlar çox vaxt proseslərə konkret şəxsin istəklərindən daha çox təsir edir.