Ukrayna prezidenti Volodimir Zelenski Rusiyanın danışıqlar istəmədiyini deyib və Rusiya Federasiyasını acgöz timsahla müqayisə edib.

Publika.az xəbər verir ki, o, bunu Bleddə (Sloveniya) keçirilən strateji forumun iştirakçıları qarşısında çıxışı zamanı deyib.

Prezident vurğulayıb ki, Ukrayna öz ərazilərini qaytarmaq istəyir.

O əlavə edib ki, bu qayıdış prosesi fərqli ola bilər.

"Amma istənilən danışıqlar hər iki tərəfin istədiyi kimi olmalıdır. Bu, Rusiya hakimiyyətinin növbəti açıq yalanıdır, onlar danışıqlara hazır deyillər, bunu istəmirlər. Onların başa düşdüyü kimi, danışıqlar ultimatumdur. Biz Donbass və Krımın Rusiya əraziləri olduğunu qəbul etməliyik.

Bu, sadəcə olaraq, yad olan hər şeyə acgöz kimi baxan bir timsahdır... Onlarla necə danışırsınız danışın, yenə də altı aydan sonra başqa ərazimiz üçün gələcəklər. İstəyirəm ki, bizimlə birlikdə hər kəs bundan xəbərdar olsun", - Zelenski bildirib.

O qeyd edib ki, artıq ictimai müstəvidə ruslar deyirlər ki, Ukrayna guya Cənubi Ukraynanın müvəqqəti işğal olunmuş ərazilərini orada “referendumlar” keçirildikdən sonra Rusiya əraziləri kimi tanımalıdır.

"Onu da dərk etmək lazımdır ki, əslində Rusiya o qədər də güclü və qüdrətli deyil. Böyük dövlətlə bağlı bu əfsanə unudulmalıdır. Biz isə bunu döyüş meydanında göstəririk", - dövlət başçısı əlavə edib.