“Pakistan Türkiyə və Azərbaycanla münasibətlərinə böyük əhəmiyyət verir. Bugünkü tədbir sülh və firavanlıq kimi ortaq məqsədlərimizin göstəricisidir”.

KAİM.az xəbər verir ki, bunu Türkiyə Böyük Millət Məclisinin sədri Mustafa Şentopun ev sahibliyi ilə keçirilən Türkiyə-Pakistan-Azərbaycan Parlament Sədrlərinin İkinci Üçtərəfli Görüşündən sonra Pakistan Milli Assambleyasının sədri Raca Pərviz Əşrəf deyib.

Pərviz Əşrəf bəyan edib ki, Pakistan olaraq Azərbaycanı dəstəkləməyə davam edir: “Pakistan olaraq biz Azərbaycanın qanuni işində – ərazi bütövlüyünün təmin edilməsi və haqsız işğala qarşı mübarizəsini bundan sonra da dəstəkləyəcəyik”.

Spiker əlavə edib ki, Pakistan Türkiyənin Şimali Kipr türk Cümhuriyyəti ilə bağlı perspektivini dəstəkləməyə davam edir:

“Həmçinin Azərbaycan və Türkiyəyə BMT Təhlükəsizlik Şurasının qətnamələri çərçivəsində Kəşmir məsələsində öz müqəddəratını təyinetmə hüququna verdiyi dəstəyə görə təşəkkür etmək istəyirəm”.

Pərviz Əşrəf bu görüşün üç ölkənin əlaqələri üçün mühüm bir məhək daşı olacağını və üç ölkə arasında səmimi əlaqələrin davamını təmin edəcəyini bildirib.