"Türkiyəyə "F-16" satmaq üçün əlimdən gələni edəcəyəm. Bu döyüş təyyarələri Türkiyə Ordusuna şübhəsiz ki, ABŞ-ın milli təhlükəsizlik maraqlarına uyğun imkanlar qazandıracaq".

Publika.az xəbər verir ki, bu barədə ABŞ-ın respublikaçı senatoru Lindsay Qraham Türkiyə səfərindən qayıdarkən "Twitter" hesabından paylaşım edib.

Məlumata görə, senator şənbə günü Türkiyəyə səfər edib və prezidentin sözçüsü İbrahim Kalınla görüşüb.

Mabeyn malikanəsində keçirilən görüşdə ikitərəfli siyasi və iqtisadi əlaqələr, terrorla mübarizə, müdafiə sənayesində əməkdaşlıq, Ukrayna-Rusiya müharibəsi, Qara dəniz taxıl daşımaları, Suriya, Egey-Aralıq dənizi və digər regional məsələlər müzakirə edilib. Görüşün əvvəlində Madriddə keçirilən NATO Sammiti və qəbul edilən Yeni Strateji Konsepsiya dəyərləndirilib.

Zirvə görüşündə iki ölkə liderləri tərəfindən müsbət atmosferdə keçən görüşdən məmnunluq ifadə olunub. Bildirilib ki, Türkiyə-ABŞ münasibətləri qarşılıqlı hörmət və anlaşma əsasında, ortaq və strateji maraqlar əsasında inkişaf etməlidir. Müdafiə sənayesi sahəsində əməkdaşlıq və "F-16" məsələsində irəliləyişin iki ölkənin maraqlarına xidmət edəcəyi bildirilib.