Rusiyanın Xarici İşlər naziri Lavrov iyunun 8-də Türkiyəyə səfər edəcək. Taxıl ixracı üçün Qara dəniz dəhlizi, Rusiya-Ukrayna müharibəsi və Suriyadakı inkişaflar masadakı üç kritik gündəm maddəsi olacaq.

Səfər zamanı iki ölkəni maraqlandıran məsələlərin müzakirə ediləcəyi və prioritetlərin taxıl dəhlizinin yaradılması, Rusiya-Ukrayna müharibəsi və Suriyadakı proseslər olacağı gözlənilir.

Türkiyə Xarici İşlər naziri Mövlud Çavuşoğlu ötən gün Lavrovun nümayəndə heyəti ilə birlikdə Türkiyəyə gələcəyini açıqlayıb. Bildirilib ki, iyunun 8-də baş tutması gözlənilən görüşdə təhlükəsizlik dəhlizinin açılması məsələsi, o cümlədən Qara dənizdəki limanlarda saxlanılan buğda məsələsi müzakirə olunacaq.

Əldə edilən məlumata görə, Rusiya-Ukrayna müharibəsi səbəbindən Türkiyədən açılacaq dəhlizlə bazarlara çatacaq taxıl mövzusunda Türkiyə və Rusiya xarici işlər nazirliklərində mütəmadi olaraq danışıqlar aparılıb.

Ukrayna limanlarında ixracı gözləyən 20 milyon tondan çox taxılın olduğu iddia edilir.

Lavrovun Türkiyəyə səfəri zamanı Rusiya-Ukrayna müharibəsi ilə bağlı danışıqlar ab-havasının bərpasına da çalışılacaq. Bu görüşlər zamanı atəşkəs mühitinin yaradılması və liderlər səviyyəsində yeni görüşün mümkünlüyü ilə bağlı qiymətləndirmələrin aparılacağı bildirilir. Bu görüşün də Ukrayna tərəfinə çatdırıldığı və təmasların Türkiyədə aparılması ilə bağlı təklifin veriləcəyi deyilir.

Rusiya xarici işlər nazirinin səfəri zamanı müzakirə olunacağı gözlənilən digər məsələ Suriyadakı proseslərdir. Türkiyənin Suriyada Tel Rıfat və Mənbic bölgəsinə qarşı mümkün hərbi əməliyyatı və təhlükəsiz bölgə yaratmaq səylərinin də gündəmə gəlməsi gözlənilir.