Kiyev elektrik enerjisinin pulunu ödəmək üçün Moskvadan o qədər də xoş olmayan təklif alıb.

KONKRET.az xarici mediaya istinadən xəbər verir ki, bu barədə Çinin “Baijiahao” nəşri yazıb.

Rusiya baş nazirinin müavini Marat Xusnullin Ukrayna hakimiyyətinin xoşuna gəlməyən bəyanatla çıxış edib. O, bildirib ki, “Zaporojye” AES bundan sonra Rusiyanın xeyrinə və onun maraqlarına uyğun işləyəcək. Eləcə də orada istehsal olunan elektrik enerjisi nəzəri olaraq Ukraynaya verilə bilər, ancaq rəsmi Kiyev bunun əvəzində müvafiq ödəniş etməli olacaq.

“Baijiahao” analitikləri bunun Ukrayna üçün son dərəcə təhqiredici bir açıqlama olduğunu yazıblar.

Rusiya baş nazirinin müavini bildirib ki, əgər rəsmi Kiyev ödənişləri etməyə hazırdırsa, o zaman “Zaporojye” AES Ukraynanı elektrik enerjisi ilə təmin etməyə hazırdır.Amma ödəniş olmasa, stansiya fəaliyyətini dayandırmayacaq, sadəcə olaraq Rusiyaya çatdırılma istiqamətini dəyişdirəcək.

Qeyd edək ki, “Zaporojye” AES Ukraynanın nüvə enerjisinin yarıdan çoxunu təmin edən, illik elektrik istehsal gücü 40 milyard kilovat-saat olan Avropanın ən böyük atom elektrik stansiyasıdır. Hazırda sözügedən AES Rusiyanın nəzarətinə keçib.

Ukrayna enerji təchizatı sahəsində Rusiyadan ciddi şəkildə asılıdır. Əgər Rusiyadan təbii qaz və “Zaporojye” AES-dən elektrik enerjisi təchizatı olmasa, bu zaman Ukraynanın vəziyyəti daha da çətinləşəcək.

“Lakin Ukrayna passiv mövqedədir və danışıqlara başlamaq fikrində deyil” – çinli analitiklər yazır.

Əvəzində Kiyev Qərbdən yardım istəməkdə və münaqişəni alovlandırmaqda davam edir. Çinli ekspertlərin fikrincə, Ukrayna danışıqlar masası arxasına qayıtmalıdır. Əks halda ölkənin inkişafı hələ uzun illər ləngiyəcək və ölkə həddindən artıq acınacaqlı vəziyyətə düşəcək.