Rusiya Prezidenti Vladimir Putinin 9 May - faşizm üzərində Qələbənin 77-ci ildönümü münasibətilə təbrik etdiyi ölkələr arasında Ukrayna da yer alıb.

Publika.az xəbər verir ki, Putinin xalqa ünvanlandığı təbrik mətni ukraynalıların qəzəbinə səbəb olub.

Bildirilib ki, bu, Ukraynaya qarşı aktiv qanlı müharibə aparan Kreml rəhbərinin kinli müraciətindən başqa bir şey deyil.

Vladimir Putinin “Bu gün müxtəlif ölkələrin insanlarına bu qədər iztirablar gətirən nasizmin dirçəlişinin qarşısını almaq bizim ümumi borcumuzdur” deməsi isə müzakirələrə səbəb olub. Ukrayna mediası Putinin özünün ölkənin ərazilərini işğal etməsi, dinc sakinləri öldürməsi ilə nasizmi dirçəltiyini yazıb.

Təbrikin “DNR” və “LNR”, eyni zamanda Donbas “liderlərinə” ünvanlanması qəzəbi bir qədər də artırıb.

Rusiya Federasiyası Prezidentinin mətbuat katibi Dmitri Peskov “Danışır Moskva” radiostansiyasına müsahibəsində Putinin Qələbə günü münasibətilə Ukrayna vətəndaşlarına təbrikinin göndərildiyini, lakin bu təbrikin konkret ünvanının olmadığını qeyd edib.

“Bu, hamıya ünvanlanıb və Ukraynada Böyük Vətən Müharibəsinin xatirəsi onlar üçün müqəddəs sayılan, 9 Mayın müqəddəs bayram - Qələbə Günü kimi anan çoxları var”, - Kremlin sözçüsü bildirib.