Rusiya Prezidenti Vladimir Putinin fevralın 24-də Ukraynada hərbi əməliyyatlara başlamasından sonra “Z” hərfi müharibənin simvoluna çevrilib. Əməliyyatlardan bir neçə gün sonra rusiyalı casus siyasətçi Mariya Butina paltosuna “Z” hərfi çəkdiyi videonu paylaşıb.

“Belə davam edin, qardaşlar. Biz əbədi olaraq sizinləyik” – deyə o, video çəkilişi zamanı bildirib.

“Margin.az” “The Economist”ə istinadən xəbər verir ki, Sibirdə “Kuzbass” adlandırılan kömür mədəni bölgəsi olan Kemerovonun qubernatoru regionun adının bundan sonra kiril-latın qarışığında “КуZбасс” kimi dəyişdirilməsi haqqında fərman imzalayıb.

Eyni zamanda, martın 5-də Qətərdə keçirilən gimnastika üzrə Dünya Kubokunda ukraynalı idmançının yanında podiuma çıxan rusiyalı gimnast İvan Kuliak formasına “Z” hərfi yapışdırıb. Bu, Beynəlxalq Gimnastika Federasiyasının ona qarşı araşdırma başlatmasına səbəb olub.

Bütün bunlardan sonra bir sual yaranır: “Niyə “Z” hərfi Vladimir Putinin müharibə simvoluna çevrilib?”

Rusiya silahlı qüvvələri bu ilin əvvəlində Ukrayna sərhədləri boyunca toplaşarkən, Ukrayna kəşfiyyatının müşahidəçiləri rus tanklarının üzərində qəribə simvollar görüblər. Bu simvollar “V” və “Z” hərfləridir.

Bəzi analitiklər bunu belə izah edir ki, “Z” rus dilində “qərb” mənasını verən (Rusiya qüvvələrinin yürüş edəcəyi istiqamət) “zapad”ın qısaltmasıdır. Ola bilsin ki, bu, Kremlin Ukrayna prezidenti Volodimir Zelenskini hakimiyyətdən uzaqlaşdırmaq planlarından xəbər verir.

Hərbi analitiklər isə bunun əməliyyatlarda iştirak edən Rusiya qüvvələrinin döyüş taktikalarına uyğun gəldiyini düşünürlər.