"Soçi görüşündə masada nəzəri cəhətdən müsbət nəticələr əldə olunub”.

Sfera.az bildirir ki, bunu siyasi şərhçi Asif Nərimanlı deyib. Onun sözlərinə görə, bu nəticələrdən biri, ilin sonuna kimi sərhədin delimitasiyası və demarkasiyası mexanizmlərinin yaradılmasıdır:

"Görüşdə kommunikasiyaların açılması ilə bağlı razılaşmanın detalları gələn həftə açıqlanacaq. Putin bildirir ki, "Gələn həftə, - bu, bizim növbəti razılaşmadır, - onlar müəyyən yekunlar vurmaq və bu gün razılaşdırdığımız və qəbul etdiyimiz qərarları elan etmək üçün Moskvada toplaşacaqlar”. Bu, görüşdə kommunikasiyanın açılması ilə bağlı razılaşmaların üçtərəfli bəynatda tam əksini tapmadığı deməkdir. Mümkündür ki, liderlər nəqliyyat xətlərinin açılması qrafikini müzakirə edib və müəyyən razılaşmalar var. İşçi Qrupu razılaşdırılmayan texniki məsələlərə yekun vurduqdan sonra qərar açıqlanacaq”.

A.Nərimanlının fikrincə, prezident İlham Əliyevin çıxışı göstərdi ki, Bakı və Moskva proseslərlə bağlı eyni mövqedədir:

"Azərbaycan prezidenti iki mesaj da verdi. Birincisi, Bakı Rusiyanın təşkil etdiyi formatdan kənara çıxmaq niyyətində deyil: bu, Qərbə üz tutan Paşinyanın mövqeyinin zəiflədilməsi məqsədi də daşıyırdı. İkincisi, Əliyev "düşünürəm ki, görüşümüzün yekununun nəticələri yaxşı olacaq, bu nəticələri çox gözləmək lazım gəlməyəcək, regionda vəziyyət daha təhlükəsiz və proqnozlaşdırılan olacaq” deyə bildirdi. Bu o deməkdir ki, Bakı görüşdə əldə olunan razılaşmaların icrasının uzadılmasını qəbul etməyəcək və Əliyev regionda təhlükəsizliyin bundan asılı olacağının mesajını verdi”.

Siyasi şərhçi, həmçinin Ermənistanın sərhədin delimitasiya və demarkasiyasına, eləcə də kommunikasiyaların açılmasına razılaşdığını vurğulayıb:

"Putinin nəqliyyat xətlərindən danışarkən "dəhliz” ifadəsinə üstünlük verməsi və Əliyevin xəbərdarlıq mesajı Paşinyanın Zəngəzur dəhlizi istəyinin qəbul edilmədiyi ehtimalını gücləndirir”.

Günay Rəsulqızı
Sfera.az