“Bu gün dünyada nasizm ideologiyasını yenidən gündəmə gətirmək istəyənlər var”

Rusiya Prezidenti Vladimir Putin İkinci Dünya müharibəsində qələbənin 76-ci ildönümü ilə bağlı Moskvada keçirilən hərbi paradda çıxış edib. AYNA Rusiya mediasına istinadən bildirir ki, Putin nasizmə qarşı mübarizədə Sovet İttifaqı xalqlarının qalib gəldiyini xatırladıb.

“Həmişə xatırlayacağıq ki, bu möhtəşəm işi ərsəyə gətirən sovet xalqı idi. Müharibənin ən çətin vaxtında, faşizmə qarşı mübarizənin nəticəsini müəyyənləşdirən həlledici döyüşlərdə xalqımız zəfər üçün çətin yol keçdi, qəhrəmanlıq və fədakarlıq etdi”, - Putin vurğulayıb.

Rusiya lideri bu gün dünyada nasizm ideologiyasını yenidən gündəmə gətirmək istəyənlərin olduğunu qeyd edib: “Rusiya düşmənlərinə qarşı ölkənin maraqlarını qətiyyətlə müdafiə edəcək. Bundan hər kəs əmin olsun”.