Afrikada 300 min-3,3 milyon insan koronavirusun qurbanı ola bilər.

Publika.az xəbər verir ki, bu barədə Birləşmiş Millətlər Təşkilatının Afrika İqtisadi Komissiyası (UNECA) hesabat hazırlayıb.

Pandemiyanın iqtisadi və sosial həyata təsirlərinin araşdırıldığı sənəddə bildirilir ki, Afrikada koronavirus pandemiyasına qarşı qabaqlayıcı tədbirlər görülmədiyi təqdirdə bu rəqəmlər gerçəkləşə bilər. Qeyd olunub ki, pandemiya nəzarətə götürülsə belə, iqtisadiyyata mənfi təsirləri qaçılmazdır.

Araşdırma nəticəsində məlum olub ki, Afrika qitəsində əhalinin yalnız 34%-nin əl yumaq üçün əsas tələbatlara çıxışı var.

100 milyard dollara ehtiyac var

Araşdırma nəticəsində qənaətə gəlinib ki, hökumətlərin səhiyyə və sosial ehtiyacları qarşılaması üçün 100 milyard dollara ehtiyacı var. Bu il qitədə iqtisadi böyümənin 1,8-3,1% arasında olacağı proqnozlaşdırılır. Həmçinin, 27 milyon insanın yoxsulluğa sürüklənəcəyi, evdə işləmək imkanı olmadığı üçün işsiz qalanların artacağı bildirilir.

Afrika Xəstəliklərə Nəzarət və Profilaktika Mərkəzinin (Africa CDC) hesabatına görə, qitə miqyasında 18 min 333 nəfər virusa yoluxub. 962 nəfər dünyasını dəyişib.