"Çox ağırdır. Kədərlidir, mənəvi cəhətdən yüklüdür. Təbii ki, yoluxma riski həmişə var. Lakin bu risk barədə düşünməyə vaxtımız və həvəsizimiz yoxdur. Pasiyentləri düşünməliyik. Çünki buraya gələnlərin çoxu qorxublar. Bəziləri təlaşdadır. Biz virusla mübarizənin ön cəbhəsində olduğumuz üçün həm müalicə etməli, həm də psixoloji yardım göstərməliyik".

Kəmalə xanım reanimatoloqdur. Azərbaycanda COVİD-19 koronavirusuna qarşı mübarizə məqsədilə tətbiq edilmiş karantin çərçivəsində fəaliyyət göstərən tibb müəssisələrindən birində çalışır.

Dəqiq iş qrafiki yox bu müəssisədə. Həkimlər və tibb bacılarının iş günü ən yaxşı halda 10 saat, əksər hallarda isə 16-18 saat davam edir.

Bəzi həkimlər günlərlə ailə üzvlərini görmürlər.

Bununla bağlı məhdudiyyət və ya yasaq yoxdur. Həkimlərin özləri karantin müəssisəni tərk etmək istəmirlər.

Yardım üçün, həyatları xilas etmək üçün.

Həyat ən dəyərli məhfumdur. İndi o dəyəri qoruyanlar da həkimlərimizdir.

Belə müəssisələrdə ən gərgin iş rejimi "temperatur otaqları"ndadır: həmin otaqlarda koronavirusa yoluxmada şübhəli bilinən insanın qan analizləri test edilir.

Həkimlərimizin dediklərinə görə, bütün karantin müəssisələrində ən müasir avadanlıq var. Müdafiə kombinezonları və maskalar da yetərincədir.

"Növbə bitəndə, müdafiə kostyumlarını, yəni kombinezonları çıxaranda görürük ki, bütün paltarımız tər içindədir. Üzdə, alında, burunda, boyunda izlər qalır. Çünki qoruyucu maska və eynək dəriyə bərk yapışır. Həmkarlarımın bəziləri ağır növbədən sonra evə getmir, elə burada, stulda oturub yatırlar", - həkimlərdən biri söyləyir.

Həkimlər onu da deyirlər ki, vətəndaşlar dövlət qurumlarının tövsiyyələrinə və göstərişlərinə dərhal, şərtsiz əməl etməlidirlər, şayiələrə inanmalıdırlar.

Koronavirusa qarşı mübarizənin ön cəbhəsində olanların, bu ağ xalatlı qəhrəmanların əməllərini və işini millət, dövlət və hakimiyyət görür.

Görür və dəyərləndirir.

Prezident İlham Əliyev Yeni növ koronavirus (COVİD-19) infeksiyası ilə əlaqəli əmək şəraitinə görə dövlət tibb müəssisələrində çalışan işçilərin əməkhaqlarına aylıq vəzifə (tarif) maaşının 3-5 mislinədək miqdarda müddətli əlavə müəyyən edib.

Dövlət başçısı həkimlərin əməyini yüksək qiymətləndirdi, dövlətimiz ağ xalatlıların fədakarlığını dəyərləndirdi.

Eyni zamanda bu, Azərbaycanda yeni sosial qayğı nümunəsidir.

Azərbaycanda hakimiyyət hər vətəndaşın, insanımızın qayğısına qalır. Çünki dövlət və hakimiyyət üçün ən böyük dəyər maliyyə vəsaiti, iqtisadi amillər yox, məhz vətəndaşdır.

Avropa ölkələrinin tam əksəriyyətindən fərqli olaraq, Azərbaycan COVİD-19 koronavirusuna qarşı ən operativ və eyni zamanda effektiv mübarizə üsulunu seçdi.

Sadəcə, iki fakt: Avropa ölkələri arasında Azərbaycan orta məktəbləri, liseyləri, kollecləri, universitetləri və ən başlıcası - məktəbəqədər təhsil-tərbiyə müəssisələrini koronavirus təhlükəsi sovuşanadək qapadan ilk (!) dövlət oldu.

Avropa ölkələri arasında Azərbaycan ilk dövlət oldu ki, vətəndaşının sağlamğınını bütün iqtisadi və maliyyə maraqlarından üstün tutaraq karantin rejimini tətbiq etdi.

Hazırda ölkədə koronavirusa yoluxma eksperimental polimeraz zəncirvari reaksiya metodu ilə test olunur. Bu metod virusu DNT səviyyəsində müəyyənləşdirməyə imkan verir.

Koronavirusla bağlı bütün laborator tədqiqatları və testlər indiyədək tam pulsuz aparılır, belə da davam edəcək.

Testlər Səhiyyə Nazirliyinin Xüsusi Təhlükəli İnfeksiyalara Nəzarət Mərkəzində gerçəkləşdirilir ki, sözügedən laboratoriya təchizatına, kadr potensialına, laborator imkanlarına və s.-yə görə postsovet məkanı ölkələri ilə yanaşı, bir çox dövlətlərdəki analoji strukturlardan üstün səviyyədədir.

Avropa və Asiyanın heç bir ölkəsində belə dərin analiz və tədqiqat metodu ilə testlər dövlət hesabına aparılmayıb.

Bundan daşqa, koronavirusun yayılmasının qarşısını almaq məqsədilə ölkədə genişmiqyaslı dezinfeksiya tədbirləri gerçəkləşdirilir.

Təbii ki, ön sırada həkimlər və tibb bacılarıdır.

Bu günün gerçək qəhrəmanları...