71 yaşlı Co Kemeron İngiltərənin İnverness qraflığındakı Uaytbric şəhərində yaşayır. O, unikal insandır, çünki əsla ağrı hiss etmir.

Ailehekimiklinikasi.az Daily Mail-ə istinadən bildirir ki, Co nənə alimlərinin diqqətini məruz qaldığı cərrahiyyə əməliyyatından sonra cəlb edib. Çünki əməliyyat zamanı o, anesteziyaya ehtiyac duymadığını demiş, həkimlər də deyilənlərə əmin olandan sonra qadına, sadəcə, parasetamol vermişdilər.

Artritin ağır formasından əziyyət çəkən Co Kemeron belə əməliyyat olunmuşdu.

"Bəzən elə olur ki, ehtiyatsız davranıram, əlim yanır. Əlimin yandığını iydən hiss edirəm", - Tənha yaşayan Co nənə söyləyib.

Onun dediyinə görə də, bir neçə il əvvəl qolu sınıbmış. Ağrı hiss etmədiyindən elə sınıq qolla dolaşıb.

"Doğuş zamanı ağrı hiss etmədim. Bəzən elə olur ki, yeməyə çili sousunu həddən ziyadə əlavə edirəm. Amma yenə heç nə hiss etmirəm", - Co Kemeron deyib.

Alimlərin apardıqları araşdırmalar göstərib ki, Co Kemeronun orqanizmində DNT-nin iki mutasiyası var və bunun nəticəsində o, ağrının verdiyi fiziki diskomfortu hiss etmir.

Alimlər ümid edirlər ki, ağrıya dözüm səviyyəsi həddən ziyadə yüksək olan və yaraları tez sağalan Co Kemeronun müayinələri yeni ağrıkəsici dərmanların hazırlanmasına töhfə verəcək.