Sağlam qidalanma həm gözəlliyin, həm də yaxşı əhvalın təminatçısıdır.

Publika.az xəbər verir ki, bu barədə fikirlərini tanınmış diyetoloq Mira Markina oxucularla bölüşüb.

"Naşı adamlar üçün balanslaşdırılmış menyu tərtib etmək heç də asan deyil"-deyən mütəxəssis bu zaman köməyə "boşqab qaydası"nın çatdığını açıqlayıb:

"Vizual olaraq sizin yeməyinizin dörddə birini zülallar təşkil etməlidir. Buraya ət və ya balıq daxildir. Digər dörddə bir hissəni qarnirə ayırın. Ən yaxşısı, bu siyahıya yarma, makaron, istisna hallarda, buğda çörəyini yaza bilərsiniz. Boşqabınızın yarısını tərəvəz tutmalıdır".

Diyetoloq ucuz və vitaminli menyu üçün sadə ərzaqları seçməyi məsləhət görür:

"Düzgün və sağlam qidalanmaya keçəndə bahalı ekzotik meyvə və ərzaq almağa ehtiyac yoxdur. Meyvələri mövsümə uyğun seçin. Onlar həm ucuzdur, həm də tərkibində zərərli maddələr olmur. Soğanı, keşnişi, cəfərini, şüyüdü özünüz becərsəniz çox yaxşıdır. Onlar hətta otağınızda dibşəklərdə yetişə bilər...".