- “Dağlama” - əsasən dəri altında piy vəzi, podaqra adlanan fırların yaranması zamanı istifadə edilərdi. Məqsəd müəyyən nöqtəyə istiliklə təsir edərək diksindirmək, orqanizmin cavab reaksiyasını almaqdır. Prosedur girdə formada, hamar yonulmuş dağdağan ağacı ilə və ya yandırılmış kiçik bir yovşan dəstəsilə edilir. Əslində, dağlama deyilsə də məqsəd həmin fırı “qorxutmaqdır”, yəni demək olar ki, yanıq yeri və ya izi qalmırdı.
-“Dağlama” üsulundan başqa “alazlama” üsulu adlı qədim müalicə forması olmuşdur. Bu üsul haqqında Deniz Karakurt belə məlumat vermişdir: Alazlama: Atəş Tədavisi-yalazlama, yalaslama, alaslama kimi də deyilir və xəstəlikləri atəşlə tədavi etmək deməkdir.
-Alov və od yaranışın dörd ünsüründən biridir. Yaranışın hər dörd ünsürü əslində həm də təmizlik vasitələridir. Məsələn: günəş və ya istilik mənbəyi olan od/alov ən güclü təmizlik, infeksiyaları məhv edən vasitədir.
-Torpaq- əgər cəsədləri, ən ağır xəstəlik tutmuş heyvanlar torpağa basırılmasa yoluxucu xəstəliklər baş alıb gedər.
-Su- buldiyimiz yuyucu, təmizləyici və həyatımızı onsuz təsəvvür edə bilməyəcəyimiz yaradılış ünsürüdür.
-Hava da digər ünsürlər kimi, həm təmizləyici vasitə, həm də həyat mənbəyidir.
-Bahar bayramında, ilaxır çərşənbələrində yeni ilə təmiz evlə, yeni paltarla, təmiz bağ-bağça ilə çıxdığımız kimi, həm də təmiz aura ilə yeni ili qarşılamaq üçün alovun üzərindən atılmaq auranın təmizlənməsi vasitələrindən biri olaraq qəbul edilə bilər.
-Aura ezoterik mənada- insan bədənindəki enerjinin ətrafda yaratdığı bir mühit kimi anlaşıla bilər. Onun “çirklənməsi” isə hər gün qarşılaşdığımız mühit və şəraitdə istər xoşumuza gələn, istər xoşumuza gəlməyən insanlar olsun bu zaman yaşadığımız stresslər, gördüyümüz hadisələrlə əlaqələndirilir.
-Atəşin üstündən tullanmaq, üzərlik buxuru – bunlar od ünsürü ilə ünsiyyət qurmağın özünəməxsus təcrübələridir.
-Başa duz, üzərlik və soğan qabığı fırlatmaq sonra onu alova və ya suya atmaq da auranı təmizləməyin üsullarından biridir.

Müəllif: Firəngiz Rüstəmova
"FOLK VƏ YA XALQ TƏBABƏTİ" kitabından