ABŞ-da aparılan tədqiqat nəticəsində 67 milyon 74 min 23 nəfərin bədən temperaturu hesablanıb. Əldə olunan nəticəyə görə, son iki əsrdə insanların hərarəti aşağı düşüb.

Publika.az-ın məlumatına görə, Stenford Universitetinin tədqiqatçılarının apardığı araşdırmaya əsasən məlum olub ki, 21-ci əsrdə doğulan insanların bədən temperaturu 19-cu əsrdə anadan olanlara nisbətən daha aşağıdır.

Mütəxəssislər ilk olaraq 1862-1930-cu illərdəki Amerika müharibəsi qazilərinin, daha sonra 1971-1975-ci illərdə ABŞ Beynəlxalq Sağlamlıq və Qidalanma anketinə qatılanların, son olaraq 2007-2017-ci illərdə Stenford Sağlamlıq Mərkəzinə gələn xəstələrin bədən temperaturu qeydlərini araşdırıb.

Sözügedən qeydləri yoxladıqdan sonra əldə olunan məlumata görə, 21-ci əsrdə dünyaya gələn kişilərin bədən temperaturu 19-cu əsrdə anadan olanlara nisbətdə 0.6, qadınların bədən hərarəti isə 1890-cı illərdə doğulan həmcinsləri ilə müqayisədə 0.03 dərəcə aşağıdır.

Temperaturun aşağı düşmə səbəbi isə açıqlanmayıb.

Qeyd edək ki, bədənin ortalama temperaturu 37 dərəcə qəbul edilib.