Rusiyanın Perm Milli Tədqiqat Politexnik Universitetinin (PNRPU) alimləri 2025-ci ilin yazında baş verəcək əsas astronomik hadisələri açıqlayıblar.

Publika.az xəbər verir ki, bu barədə qurumun mətbuat xidməti məlumat yayıb.

Məlumata görə, qışın sonuncu günü - fevralın 28-də planetlərin (Saturn, Merkuri, Neptun, Venera, Uran, Yupiter və Marsın) səmada nadir paradı baş tutacaq. Bu fenomen müşahidə üçün ideal şərait yaradacaq Yeni aya təsadüf edəcək. Venera, Yupiter, Merkuri və Marsı xüsusi avadanlıq olmadan görmək olar, lakin Uran, Neptun və Saturn üçün durbin və ya teleskop tələb olunacaq.

14 martda Ayın tam tutulması baş verəcək və bu müddət ərzində Ay qırmızı rəng alacaq. “Qanlı Ay” kimi tanınan bu fenomen Dünyanın böyük bir hissəsində görünəcək. Müşahidə üçün xüsusi avadanlıq tələb olunmur, lakin minimum işıq çirkliliyi olan bir yer seçmək vacibdir.

29 martda qismən Günəş tutulması baş verəcək. Ay Günəş diskinin bir hissəsini əhatə edəcək, lakin təhlükəsiz müşahidə üçün xüsusi günəş filtrləri və ya eynək tələb olunacaq.

2025-ci ilin yazında iki parlaq meteor yağışı gözlənilir: Lirid və Eta Aquarid. Lirid aprelin 16-dan 25-nə kimi aktiv olacaq, zirvəsi aprelin 21-dən 22-nə keçən gecəyə təsadüf edəcək. Eta Aquarid isə aprelin 19-dan mayın 28-dək görünəcək, mayın 5-dən 6-na keçən gecə pik aktivlik müşahidə olunacaq. Daha yaxşı görünüş üçün şəhərdən kənarda qaranlıq bir yer seçmək tövsiyə olunur.

Mart ayında Saturnun halqaları faktiki olaraq görünməz olacaq. Bu fenomen planetin orbital hərəkəti ilə əlaqələndirilir. Məsələ burasındadır ki, biz bu planetin halqaları ilə eyni müstəvidə oluruq və bu zaman onları kənardan görürük, halqalar isə çox nazikdir - təxminən 30 metr qalınlıqda. Halqalar yalnız bir neçə ildən sonra yenidən görünəcək.

Bundan əlavə, 20 martda gecə ilə gündüzün bərabərləşəcəyi yaz bərabərliyi qeyd olunacaq. Bu hadisə astronomik yazın başlanğıcına işarədir.