D vitamin orqanizmdə baş verən bir çox proseslərdə aktiv iştirak edir. Mütəxəssislərin fikrinə görə, bu vitaminin orqanizmdə normal səviyyədə olması hətta insanın həyatını uzada bilir.

Əksinə isə D vitamininin defisiti ölüm riskini artırır. Bu xüsusilə şəkərli diabet və xroniki xəstəlikləri olan insanlara aiddir.

Saglamolun.az Focus.de-yə istinadla bildirir ki, alimlər 1991-2011-ci illər arasında 80 minə yaxın insanın sağlamlıq və həyat tərzinə nəzarət edirdilər. Nəticədə məlum olub ki, qanda D vitamininin kəskin defisiti (10 nmol/l-dan aşağı) ölüm riskini 2-3 dəfə artırır. Əksinə isə D vitamininin 50-90 nmol/l səviyyədə olması ölüm riskini 30-40% azaldır.

Qanda D vitamininin səviyyəsi 50 nmol/l-dan aşağı olan şəkərli diabet xəstələrində qanda D vitamininin normada olan xəstələrlə müqayisədə ölüm riski 4,4 dəfə artmış olur.

D vitaminin defisitinin simptomları:

- İmmunitetin zəifləməsi, orqanizmin infeksiyalara qarşı davamlılığının azalması

- Əhvalın düşməsi, depressiya

- Əzələ və oynaqlarda ağrılar

- Dırnaqların kövrək olması, qırılması

- Səbəbsiz yorğunluq

D vitaminin əsas mənbəyi gün şüalarıdır. Bu vitamin dərimizdə gün şüalarının təsirindən sintez olunur. D vitamininin günlük dozasını almaq üçün 15-20 dəqiqə ərzində gün şüalarını qəbul etmək kifayətdir.

D vitamininin kəskin defisiti zamanı vitamin həkim tərəfindən əlavə olaraq təyin oluna bilər.