Psixoloq Elizaveta Kulikova xəbərdarlıq edir ki, sağlam həyat tərzinə birdən-birə və sərt şəkildə keçid psixoloji problemlərə səbəb ola bilər. Onun sözlərinə görə, həddindən artıq məhdudiyyətlər və ideal həyat tərzinə çatmaq istəyi depressiya, narahatlıq, qidalanma pozuntuları və emosional tükənmə riskini artırır.

E-saglam.az xəbər verir ki, mütəxəssis bildirir ki, bir çox insan motivasiya ilə qısa müddətdə həyatını tam dəyişməyə çalışır: sərt pəhrizlərə başlayır, intensiv idman edir və qidalanmasına həddindən artıq nəzarət edir. Lakin orqanizm və psixika bu kəskin dəyişiklikləri stress kimi qəbul edir. Nəticədə motivasiya tez azalır, uğursuzluq zamanı isə günahkarlıq hissi yaranır.

Psixoloqun fikrincə, sağlam həyat tərzi qurmaq istəyənlər ilk növbədə yanaşmalarını dəyişməlidir. Özünü məcbur etmək və ya cəzalandırmaq yox, daha yaxşı hiss etmək məqsədi ilə hərəkət etmək daha düzgün yanaşmadır. Bu, həm psixoloji, həm də fiziki davamlılıq baxımından daha effektivdir.

Eyni zamanda, bədənin siqnallarına diqqət yetirmək vacibdir. Ac olduqda yemək, tox olduqda dayanmaq və kiçik pozuntulara görə özünü günahlandırmamaq sağlam münasibətin əsas hissəsidir. Hərəkət də məcburiyyət deyil, zövq verən fəaliyyət kimi seçilməlidir – gəzinti, rəqs və ya yoqa kimi alternativlər daha davamlı nəticə verir.

Ekspert vurğulayır ki, sağlam həyat tərzinə keçid tədricən və fərdi yanaşma ilə həyata keçirilməlidir. Hər kəs üçün uyğun olan vahid model yoxdur və əsas məqsəd uzunmüddətli, balanslı və psixoloji cəhətdən sağlam vərdişlər formalaşdırmaqdır.