Gündəlik nə qədər su içməli olduğumuzla bağlı sual illərdir müzakirə olunur. İnsanların çoxu “gündə 1,5-2 litr su içmək lazımdır” qaydasını qəbul etsə də, mütəxəssislər bunun hər kəs üçün eyni dərəcədə doğru olmadığını bildirir.

Publika.az xəbər verir ki, bu barədə qida mütəxəssisi Viktoriya Strijevskaya danışıb.

Onun sözlərinə görə, gündəlik maye norması yalnız içilən sudan ibarət deyil. Gün ərzində qəbul edilən bütün içkilər, həmçinin qidalardakı maye - şorbalar, meyvə-tərəvəz və digər məhsullar da bu normaya daxildir. Bu isə o deməkdir ki, düzgün qidalanan insan artıq mayenin bir hissəsini yeməklərdən alır.

Ekspert vurğulayıb ki, orqanizmin suya ehtiyacı mövsümdən və hava şəraitindən asılı olaraq dəyişir. İsti havalarda insan daha çox tərlədiyi üçün daha çox mayeyə ehtiyac duyur. Soyuq aylarda isə bu ehtiyac azalır və susuzluq hissi yoxdursa, özünü məcbur edib çox su içmək vacib deyil.

Strijevskaya əlavə edib ki, həddindən artıq su qəbulu da zərərli ola bilər. Onun sözlərinə görə, artıq maye böyrəklərə əlavə yük yaradır və orqanizmdən yalnız zərərli deyil, faydalı maddələrin - xüsusilə mineralların da yuyulmasına səbəb ola bilər.

Mütəxəssis qeyd edib ki, gündə 2 litr su içməmək narahatlıq üçün əsas deyil. Əsas məsələ orqanizmdə maye balansını qorumaq və daha çox təbii içkilərə üstünlük verməkdir.