Beynəlxalq alimlər qrupu qara qarağat suyunun həm istirahət zamanı, həm də zehni stress altında beynin ön loblarına qan axınını artırdığını müəyyən edib.

E-saglam.az xəbər verir ki, araşdırma Nutritional Neuroscience (NN) jurnalında dərc olunub.

Eksperimentdə 18–35 yaş arası 20 sağlam gənc iştirak edib. İştirakçılar bir dəfə 500 mq polifenolla zəngin Blackadder qara qarağat şirəsi, digər dəfə isə dad və rəngi eyni, lakin aktiv maddəsi olmayan plasebo içiblər. Beyin qan axınının dəyişikliklərini izləmək üçün yaxın infraqırmızı spektroskopiya istifadə olunub.

Nəticələr göstərib ki, şirəni içdikdən 35 dəqiqə sonra sol frontal lobda oksigen doymasının səviyyəsi artıb, deoksihemoglobin tərkibi isə azalıb. Bu, beyinə daha səmərəli oksigen tədarükü və damar funksiyasının yaxşılaşdığını göstərir. Sol prefrontal korteksdəki qan axını diqqət və qərar qəbul etmə proseslərinin aktivliyini artırır.

Qara qarağat xüsusilə polifenollar və antosiyaninlər ilə zəngindir. Bu birləşmələr qan damarlarını genişləndirən azot oksidi istehsalını stimullaşdıra və beyin qan axınını tənzimləyən dopamin və serotonin səviyyələrinə təsir edə bilər.