Sünnət həm dini, həm də mədəni səbəblərə görə dünyada geniş şəkildə həyata keçirilən cərrahi əməliyyatdır.

Medicina.az xəbər verir ki, bu prosedur, adətən oğlanların və ya bəzən yetkin kişilərin penisin ucundan sünnət dərisinin cərrahi yolla çıxarılmasını nəzərdə tutur.

Müsəlman icmaları arasında sünnət Məhəmməd peyğəmbərin sünnəsi sayılır və dini bir öhdəlik hesab olunur. İslamda sünnət üçün konkret yaş olmadığı halda, Peyğəmbərin nəvələri İmam Həsən və İmam Hüseyni anadan olmalarının yeddinci günündə sünnət etdiyi məlumdur. Yəhudi inancında Allahın İbrahim peyğəmbərə verdiyi əmr əsasında sünnət doğulduqdan sonra səkkizinci gündə edilir.
Sünnətin tibbi faydaları da müzakirə olunur. Onun sidik yolları infeksiyaları, cinsi yolla keçən infeksiyalar və HİV infeksiyası riskini azaltdığına dair fikirlər var. Sünnətsiz kişilərdə cinsiyyət orqanının ucu altında smegma toplanır ki, bu da gigiyena problemlərinə və infeksiyalara səbəb ola bilər.

Mütəxəssislər sünnət üçün ideal yaşla bağlı müxtəlif fikirlər söyləyirlər. Bəziləri uşağın üç yaşına qədər sünnət olunmasa, yeddi yaşına qədər gözləməyi məsləhət görür. Üç ilə yeddi yaş arasında uşaqlar anlaya bilərlər və bu, psixoloji cəhətdən travmatik ola bilər.

Yeddi yaşından sonra uşaqlar vəziyyəti daha yaxşı başa düşür və qəbul edirlər.

Sünnət üçün qəti yaş məhdudiyyəti olmasa da, uşağın fiziki və psixoloji hazırlığını nəzərə almaq vacibdir. Hər bir ailə övladının sağlamlığını nəzərə alaraq bu qərarı verməlidir.