⁠“JAMA Sağlamlıq Forumu”nda dərc olunan yeni araşdırma COVID-19 pandemiyası dövründə tətbiq edilən hər 5400 vaksin dozasının bir insanın həyatını xilas etdiyini ortaya qoyub. Bu nəticə elmi cəhətdən əhəmiyyətli sayılsa da, cəmiyyətdə birmənalı qarşılanmayıb. Artıq dünyada milyonlarla insan bu nisbəti az hesab edir və peyvəndlərin əbəs yerə vurulduğunu düşünür.

Bu araşdırmanın nəticələri COVID-19 peyvəndlərinin ümumi effektivliyi barədə nə deyir? Həqiqətən biz əbəs yerə peyvənd olunmuşuq? Bu vaksinlər bizə necə yardım etmiş olub?

Globalinfo.az-a danışan tibb elmləri doktoru, professor Adil Qeybulla deyib ki, peyvəndin əbəs yerə vurulduğunu demək doğru olmaz:

“Daşıyıcı virusların konkret peyvəndi olmur, çünki onlar daim mutasiya edərək formasını və xassələrini dəyişdirir. Lakin bu proses bütövlükdə immun sistemini həssas saxlayır. Məsələn, koronavirusun SARS-CoV-2 virusunun xüsusiyyətləri onun spik zülalı ilə bağlı idi və vaksin məhz bu xüsusiyyəti hədəf alaraq hazırlanmışdı. Molekulyar biologiyanın ən müasir nailiyyətləri ilə yaradılan vaksinin əsas məqsədi infeksiya zəncirini qırmaq idi. Həqiqətən də, bu oldu və qlobal pandemiya sona çatdı. Doğrudur, hələ də epidemiyalar davam edir, amma vaksinasiyanın rolu böyükdür. Bu baxımdan, peyvəndin əbəs yerə olduğuna inanmıram. Əksinə, bu, elmi cəhətdən əsaslı və müsbət nəticələrə gətirib çıxaran bir təşəbbüs idi”.

Mütəxəssis qeyd edib ki, DNT (dezoksiribonuklein turşusu) tərkibli viruslarda hazırlanan vaksinlər daha spesifik, etibarlı və mötəbərdir:

“Məsələn, təbii çiçək virusu kimi, dünyada milyonlarla insanın həyatını itirməsinə səbəb olan bir epidemiyanın, məhz vaksinasiya nəticəsində 1980-ci ildə sona çatdığını və Dünya Səhiyyə Təşkilatının bu barədə rəsmi hesabat təqdim etdiyini qeyd etmək olar. Bu gün həmin xəstəlik artıq mövcud deyil. Təbii ki, COVİD-19 əleyhinə olan vaksindən birbaşa və dərhal tam effekt gözləmək də mümkünsüz olub, çünki vəziyyət əvvəldən aydın idi”.