Sumaq - tərkibi faydalı maddələrlə zəngin olan təbii bitki növüdür. Onun suyundan müntəzəm istifadə etmək sağlamlığa müxtəlif təsirlər göstərə bilər. Xüsusilə bir həftə ərzində gündəlik olaraq sumaq suyu içmək bədəndə mühüm dəyişikliklərə səbəb ola bilər.

Milli.Az xəbər verir ki, mütəxəssislərin fikrincə, sumaq suyu orqanizmdə iltihabəleyhinə və antioksidant təsir göstərərək immun sistemini gücləndirir. Həzm sisteminin fəaliyyətini tənzimləyir, mədə turşusunu balanslaşdırır və şişkinliyi azaldır. Bununla yanaşı, sumaq suyu qan şəkərinin səviyyəsini sabitləşdirməyə kömək edir, bu da xüsusilə şəkərli diabet riski olan şəxslər üçün önəmlidir.

Sumağın tərkibindəki təbii maddələr metabolizmi sürətləndirə və arıqlama prosesinə müsbət təsir göstərə bilər. Bəzi hallarda isə iştahanın azalmasına səbəb olduğu müşahidə olunub.

Lakin mütəxəssislər xəbərdarlıq edirlər ki, sumaq suyundan düzgün istifadə olunmadıqda müəyyən mənfi təsirlər də yarana bilər. Aşağı təzyiqi olan şəxslərdə halsızlıq və başgicəllənmə halları baş verə bilər. Hamilə və süd verən qadınlara, eləcə də böyrək xəstəliyindən əziyyət çəkənlərə həkimlə məsləhətləşmədən istifadə etmələri tövsiyə olunmur.

Sumaq suyunun hazırlanması isə sadədir. Bir stəkan qaynar suya bir çay qaşığı sumaq əlavə olunaraq 10 dəqiqə dəmlənir. Gün ərzində bir dəfə, əsasən yeməkdən sonra içilməsi məsləhətdir.

Bir həftəlik istifadədən sonra təsirlərin hiss olunmağa başladığı bildirilir. Daha uzun müddətli kurslar üçün isə ara verilməsi vacib sayılır.