İsrailin Baş naziri Benyamin Netanyahu ölkəsinin İrana qarşı hərbi əməliyyatları bərpa etməyə hazır olduğunu bildirib. Netanyahu Livanla aparılan danışıqlara paralel olaraq “Hizbullah”a qarşı əməliyyatların davam etdiyini vurğulayıb.

Baş nazir həmçinin İrana münasibətdə İsrailin mövqeyinin ABŞ-la üst-üstə düşdüyünü söyləyib. Lakin Vaşinqtonun Tehralna atəşkəs əldə etməyə çalışdığı, Təl-Əvivin isə buna qarşı çıxdığı qeyd olunur.

Globalinfo.az-a danışan politoloq Qabil Hüseynli deyib ki, ümumi siyasi və hərbi dinamika Benyamin Netanyahunun ritorikasının daha çox həm daxili auditoriyaya, həm də regional rəqiblərə yönəlmiş siqnal xarakteri daşıdığını göstərir:

“İsrail rəhbərliyi xüsusilə təhlükəsizlik məsələlərində sərt mövqe nümayiş etdirməyə çalışır, çünki bu, həm siyasi legitimlik, həm də çəkindiricilik baxımından vacibdir. Eyni zamanda İsrail ilə ABŞ arasında strateji əlaqələr o qədər dərin və çoxşaxəlidir ki, Vaşinqtonun iradəsini tamamilə nəzərə almamaq praktikada nadir hallarda baş verir.

Digər tərəfdən, İran və “Hizbullah” kimi aktorlarla bağlı məsələ İsrail üçün ekzistensial təhlükə kimi təqdim olunur. Bu səbəbdən, əgər İsrail rəhbərliyi real və yaxın təhlükə gördüyünü iddia edərsə, o zaman ABŞ-ın daha ehtiyatlı və ya diplomatik xəttinə baxmayaraq, məhdud və ya lokal hərbi addımlar atması mümkündür. Amma bu addımların genişmiqyaslı müharibəyə çevrilməsi ehtimalı yenə də ABŞ-ın mövqeyindən ciddi şəkildə təsirlənir.

Yəni ABŞ atəşkəsə üstünlük verərsə, İsrailin bunu rədd edib açıq şəkildə zidd mövqe tutması ehtimalı mövcuddur. Amma bu, daha çox taktiki səviyyədə, məsələn, müəyyən əməliyyatların davam etdirilməsi kimi özünü göstərə bilər, nəinki ABŞ-la açıq siyasi qarşıdurma formasında. Çünki iki ölkə arasında hərbi, maliyyə və diplomatik bağlılıq İsrailin manevr imkanlarını müəyyən çərçivədə saxlayır”.